İron, Hindıstanədə bıə anti mıslmonə hərəkəton məhkumış karde.

İroni xarıci vəzarətxonə sıxənəvot Hindıstanədə bıə anti mısılmonə hərəkəton məhkumış karde və votışe: Hindıstaniku jıqonə xəbəon muntəşir bey əmni niqəran kardedə.

Seyed Əbbas Musəvi umidəvob ki Hindıstanədə repressivə hərəkəton sə bıbu əv həm de Hindıstani dıvləti tədbiron.

Musəvi əlovəş karde: İron neziku və de diğğət Hindıstanədə məzhəbi ixtilafon barədə daveon manitorinq kardedə.

İroni xarıci vəzir Muhəmməd Cəvad Zərif həm zinə şəv ıştə Twitter səhifədə İronış çı Hindıstani dustə kişvər bə hisobış varde ki ısət Hindıstani mısılmonon vəziyəti barədə niqəran heste.

Əv Hindıstani rəsmi şəxsonku tələbış karde ki bo ım kişvərədə həmmə kəson ozodə jimoniro şərayeti hozzokə və jıqonə be məeno cinoyəton vəy beqəti.

Zərif əlovəş karde: taleədə şərayet fəğət de ğanun iyən  muzakirəon bəpe təyin bıbu.

Zinə İroniku Əhle Beyt(ə) beynəl xalğ icmae həm de bəyaniyə Hindıstani Boddiston anti mısılmonə cinoyəton məhkumış karde və ım kişvəriku tələbış karde ki bə mısılmonon həx-huğuği ehtırom bınə.

Beynəl xalğ koonədə İroni islamiyə şura məclesi məslehətçi Husein Əmir Əbdullahiyan həm Hindıstanədə Boddiston anti mısılmonə mıtəşəkil cinoyəton barədə ıştə niqərani elanış karde.