İronədə rəvoc peydo kardə virusi barədə İroni Yolə Rəhbəri tovsiyəon.

İroni Yolə Rəhbər zinə do kaşte ruji mınosibət mivə do kaşte bəpeştə İronədə tojə rəvoc peydo kardə virusi barədə çand qılə tovsiyəş karde.

Həzrəte Ayətullah Xamenei do kaşte qıləy bərəkətin ko bə hisobış varde və hamiyəş: jəqo ki çimi bənav təbibon, noxəşonku muhafizəkəyon iyən damon kadronku ğədrdonti kardəm be ijən ım əzizon erjinə ko bə təğdiri loyiğ zınəydəm boçi ki çəvon ım ko bənə Xıdo roədə cihod bə hisob varde bəbe.

İroni Yolə Rəhbər bo noxəşonro səloməti, bo mardə kəsonro Xıdo rəhmət və bo çəvon ailə səbr və oromtəti tələbış karde və hamiyəş: səhiyyə iyən təbibon tovsiyəonku kamilən bəpe təbəiyət bıbu boçi ki Xıdo bəmə vacibış karde ki ıştə və co kəson səloməti barədə məsuliyətin əməl kəmon.

Həzrəte Ayətullah Xamenei co qılə tovsiyədə bə həmmə kəson bə Xıdo təvəkol və təvəsoli bəyonış karde və votışe: əlbətə ım bəlo anədə əzəmətinə ni və əmə co qılə yolə bəloon təcrubə kardəmone əmmo az bə cıvonon pokə dıliku rost bıə dəvo iyən pərhizkaron təvəsol çı dard və bəlo məhv karde xoto vey omdəvom boçi ki bə Xıdo dərqah təvəsol karde iyən Peyğombər(s) iyən Əiməye Əthar(ə)-iku şəfoət tələb karde vey problemon həl kardedə.

İroni Yolə Rəhbər bə ım virusi dınyoədə rəvoc peydo karde həm işorəş ka və votışe: İroni rəsmi şəxson i minə rujiku ım virusi barədə rostə xəbəon bə millət elan kardışone əmmo kali kişvəronədə ki ım virus vey şiddətin rəvoc bıə çəy rəsmi şəxson xəbə doeku imtino kardedən əmmo əme bo çəvon noxəşonro həm Xıdoku afiyət və səlomətəti tələb kardedəmon.

Həzrəte Ayətullah Xamenei bə həminə əyyamədə çok və Xıdo xoş omə koon bənə maliyə koməkon və səhiyyə təchizaton baxşe ki İronədə əncom bey holədəy işorəş karde və votışe: ım hərəkəton vey çokin və de həminə hərəkəton əncom doe, bəlo bə rəhmət əvəz bıdə və təhdid bənə fırsət bəbe, Xıdo bo İroni milləti səloməti aid kə.