İroni Yolə Rəhbəri tərəfo ımsornə sori nom vıjniyə bəy.

İroni Yolə Rəhbər Hecri Şəmsi 1399-nə sori nomi istehsali vaştemon vıjnişone və hamiyəşe: istehsalədə vaştemon bəpe milləti jimonədə his kardəninə əvəzon bois bıbu.

İroni Yolə Rəhbər ımruj sıb noyə sori dəme mınosibəti i minə rujədə bıə Həzrəte İmom Musa Kazım(ə) şəhodəti xoto bə ə həzrəti səlomış vığande və ome rujonədə məbəs id və ısətnə Nəvuzə İdi bə həmmə kəson xusosi şəhidon və conbozon və səlomət meydonədə xidmətəkəyon ailəon təbrik vot bəpeştə Hecri Şəmsi 1399-nə sori nomi istehsali vaştımon vıjnişe.

İroni Yolə Rəhbər bə 1398-nə sorədə bıə şəhidon ailəon xusosi bə yolə şəhid və fəxrinə fərmondə şəhid Ğasım Suleymani, Şəhid Əbo Məhdi Əlmohəndes və çəvon həmrəzmon, Kerman şəhri hadisə şəhidon iyən İronədə sərneşin təyyarə və səlomət şəhidon ailəon təsliyət və təbrikış vote iyən dəvardə sori bo İroni millətiro qıləy saxtə sor bə hosobış varde bəpeştə votışe: dəvardə sor de ovvizi de koronavirusi səpe və sori mıddətədə çandə bəloon əcumlə Zəlzələ iyən sanksiyaon vindemone ki şəy muhimmə qılə İron və islami yolə sərdor şəhid hac Ğasım Suleymani terror karde hadisədə moşahidə be ki de Amerkə terroristə dıvləti vasitə əncom be.

Ə həzrət dəvardə sorədə bıə qırd imtevonış vey saxtə bə hisobış varde iyən bə ım imtevononədə bıə  dərson işorə karde çərçivədə hamiyəşe: saxtion vədə səbarzəti qıləy milləti zumandəti iğtidor və etebo bois bıdə jəqo ki İroni millət detosə bə ısət bə problemon ğalib ome peşo həm əvoni məğlub bəkay boçi ki qıləy millət de rohət tələbi və rifohtələbi muvəffəğ bıdəni.

Həzrəte Ayətullah Xamenei əlovəş karde: anti İron sanksiyaon detosə bə ısət qırd zərəl-ziyanon kənoədə əmni məcbur kardedə ki ıştə jimoni ehtiyacon daxıli imkanatonku təmin kəmon ki ım hərəkət vey foydəş bəbe və bəpe çəy ğədri beznəmon.

İroni Yolə Rəhbər təsdiğış kare: dəvardə sor qıləy saxtə sor be ki bo millətiro vey mışkilaton icodış karde əmmo çandə muvəffəğiyəton həm bə dast ome ki stajış nıbe.

Ə Həzrət kişvərədə itehsali barədə həm bə rəsmi şəxson xətob votışe: bəpe jıqo əməl kəmon ki iğtisodi itehsolədə vaştemon millət ıştə jimonədə əvəzon his kon.