İİR Ərteşi Ruj.
De Miladi təğvimi aprelə manqi 17-ədə İroni İslamə Respublika Ərteşi ruj məmləkəti 24 qılə ostanədə de “Xidməti Parad” dəvunie ğeyd kardışone. Im idə ruji bino 1979-minə sori İslamiə İnğilabi bə peş həzrəte İmom Xomeyni bə keşvəri hərbiə ğıvvon doə dastəq və har sor ım rujədə bə Ərteşi şərəf kutləviə parad dəvunie barədə dəsturi nəticədə noə bıe.
Imsornə tədbir İronədə , həmən həmə dınyoədə koronavirusə pandemeya səbəbiku parad de ım virusi mubarizə tədbir və ovdonon numayiş karde muşayət bedəbe. Bə səbəb bey “Xidməti Parad” votışone. Bı tədbirədə ekoloqiya muhafizə əvecon, səyyari mərizxonə diləqon, hərbiə ğıvvon de ım pandemiya mubarizədə bə əhali nişun doə koməkon numayiş kardışone. Paradi bə çəton çey iştirakəkon de şəhəri kuçəon dezinfeksiya məşğul bin və bə noxəşinon komək karde ro bə muxtəlif məntəğəon dəro qınin.
“Parstoday” sayt xəbə dodə ki, çe İslami İnğilabi yolə rəhbər Ayətullah Seyid Əli Xameney dəftərxonə rəisi de ım əlomətinə ruji munasibəti çe Ali Rəhbəri səlom və ehtiram bə hərbiə ğıvvon həmə heyəti rosnişe. “İran.ru” saytiən İroni Xarici Koon vəzir Məhəmməd Cavad Zərif`i de Ərteşi Ruji munasibəti musəlləhə ğıvvon təbrik karde həxədə nıvıştışe. Cavad Zərif ıştə təbrikədə İroni hərbiə şəhidon xoto bə yod vardışe, vətəni əmniyyəti təmin karde roədə hərbiə ğıvvon əvəznıbə xidməton ğeyd kardışe.
“İran.ru” sayt bə İroni Ərteşi həsr kardə co qıley məğalədə İslamə Respublika Hərbiə ğıvvon unikal, həmən ərtofi devləton ərteşonsə fərğinə məxsusiə cəhəton həxədəş nıvışte. Ğeyd karddışe ki, İroni Ərteş iqlə de məmləkəti əmniyyəti təmin karde ne, eyni vaxtədə həmən mədəni və sosial sahədən cəmiyyəti jimonədə fəal iştirak kardedə. De koronavirusi pandemiya mubarizədə hərbiə şəxsi heyəton mukəmməl iştirakşon bıe. İroni ım təşkilati həmən zumandə ideoloqiya hestışe, ım ideoloqiya bə barzə mənəviyyati istinad kardedə.
