Apreli 25-ədə Rujəmoə manq bino bedə.

“Maide.az” bə “Tasnimnevvs” sayti istinadən xəbə doəşe ki, çe Ali Rəhbər Ayətullah Seyid Əli Xamenei dəftərxonə “Ovşumi vində mərkəzi” katib Hoccətul-islam Əlirza Muvəhhidinejadi məlumat elan kardəşe. Əyo votə bedə ki, bə Ali Rəhbəri fətva əsasən Hicri-ğəməriə 1441-minə sori mubarəkə Rujəmoə manqi daxil bıe təyin karde şərton ım cur bənine:

Tojə ovşumi axtar kardə eksperton aqah kardedən ki, Pencşanbə ruji, yəni apreli 23-ədə tojə hilali vinde iqlə Cənubiə Amerikadə mumkun bıəbe, Zəmini co məntəğəonədə isə Cımmə ruji bə çəş bəçie. Muvəhhidinejad`i ımən ğeyd kardəşe ki, Rujəmoə manqi ovşumi apreli 23-minə ruji çie ehtimal xeyli kame. Bə Ali Rəhbər Ayətullah Xamenei və Ayətullah Sistani fətva muvafiğ , mubarəkə Rujəmoə manqi sıftənə ruj şanbə ruji, apreli 25-ədə dabəme.

Ayətullah Seyid Əli Xamenei de koronavirusi əlağədar bə Rujə qəte dair sualon cəvobədə votəşe ki, Rujə Xıdo bəştə bəndəon doə qıley neməte, insoni mənəvi təkamuli əsasonədə qıleye. Əv həmən İslami ğanunonədəy, bə səbəbən ey tərk karde caiz ni, əmo də şərti ki, rujə qətəkəs bızıno, rujə qəte bə həmonə odəmi noxəş qınie səbəb bəbe və ya çey noxəşi həniən qıvonin bəkarde. Bı səbəbən qirəm  insoni dıl`ədə məntiği qıley tarsış hestebu əv bəzne karde ki, rujə nıqəto, əmo peşonə vaxtonədə bəpe cey ğəzo rujə bıqəto.

Ğəfğazi Mısılmonon İdarə Ğaziyon Şuran Rujəmoə manqi bino bıe həxədə ıştə fətva doəşe. Aqah kardəşe ki, Rəməzonə manqi iminə ruj de miladi təğvimi bə aprelə manqi 25 eqınidə. Fıtrə İdən, yəni Şəvvalə manqi sıftənə ruj de ovşumi vinde muvafiğ bə mayə manqi 24-minə ruji təsaduf bəkarde. Fıtrə zəkati miğdarən bə odəməhisob 5 mənotiku tosə 10 mənoti ğədərədə bənine.