İroni ıştə iminə peyk bə orbit bekardəşe.

İİR ıştə sıftənə kosmik peyk bə orbit bekardəşe. Bə “Sepah Nevvs”i doə xəbə əsasən “NUR” nominə ım peyk de “Ğasid” peykkırniə dasqoh vasitə 425 km barziədə bə orbit dəğandə bıə.

İroni Milli Əmniyyəti Ali Şura katib Əli Şamxani de ım əlamətinə hadisə əlağədar bəyon kardışe ki, çe İslamə Respublika bı sahədə həniən surprizon hestışe, ayəndə vaxtonədə əvoniən bə jimon dəbəvunien. Ey əlavən votəşe ki, İroni xalqi tərəğği, həmən əmniyyəti təmin karde ro hokumət de elmi muasir nailiyyəton tətbiğ karde roy ıştə mudafiə ğodrəti həniən zumand bəkarde. Çe SEPAH-I Aerokosmik ğıvvon Sərkomandan briqada-qeneral ƏmirƏli Hacızadə məlumat doəşe ki, “Nur-1”peyk  bə 90 dəğiğə Zəmini qırdoy 1 kərə devr hardedə. Tehron, Zahedan və Çabahar zəminisəpeynə stansiyaonədə həmonə peyki siğnalon ğəbul kardəşone, ısət çey rabitə parametron tazisə nodən. Qenerali həmən əlavə kardəşe ki, nezə ayəndəyədə dıminə peyki bə həniən barzə orbit bekarde nəzərədə qətəşone.

İroni kosmik sahədə bə dast vardə ım nailiyyət İslamə Respublika bədxahon bə təşviş dənoəşe. AİŞ iddia kardəşe ki, quya İron deştə ım hərəkəti İMT Əmniyyətə Şura 2231 numrəninə ğətnamə darıştəşe. Çe Rusiya XKV mətbuatə katib Mariya Zaxarova ım iddia təkzib kardəşe, votəşe ki, ım ğətnamə İroni nuvə proqrami tənzim kardedə, çey kosmosi fəth kardeədə huğuğ və imkanon vədə məhdudiyyət nodəni. Amerika tərəf isə İMT Əmniyyətə Şura həmonə ğətnomə şərton de hoziəti darıştəşe.

İslamə İnğilabi Pasdaranon Korpusi komandan qeneral-mayor Hoseyn Salami bəyon kardəşe ki, İslamə Respublika bəştə əmniyyəti ciddi munasibət nişon dodə, de “Nur” peyki bə orbit bekarde zəminisə, dıyoədə və həvoədə ıştə mudafiə qabiliyyəti həniən zumand bəkarde, bə deşmenon har qıley təhdidə hərəkəton de ğətiyyəti cəvob bədo.