İronədə Koronavirusi mıbtəlo bıə kəson çok bey dəvom kardedə.

İroni səhiyyə vəzarətxonə bə İronədə 90 həzo nəfəriku vey Koronavirusi mıbtəlo bıə kəson peydo bey işorə və elanış kard: detosə bə ısət 69 həzo nəfəriku vey Koronavirusi noxəşonku çok bin.

Bə həminə raporti əsos dəvardə 24 saəti mıddətədə 1153 nəfər de Koronavirusi əlomət İronədə peydo bıdən ki de təəssufi 60 nəfər çəvonku mardən.

Isət İronədə qırd bə Koronavirusi mıbtəlo bey xoto 5710 nəfər mardən.

Əmmo İronədə Koronavirusi mudiriyətəkə kamissiya oxonə ğərolon barədə həm xəbə omey qədə qədə bəzi məzhəbi vırəon iyən məçidonədə şərayet addi və normal bey bəpeştə nımoj və dini mərasimon ijən bino bəbe.

Diplomatik fəaliyəton dəvomədə həm xəbə ome ki İroni xarıci vəzir Muhəmməd Cəvad Zərif Koronavirusi barədə təcrubəon vırə bə vırə karde iyən həmkarion çərçivədə de İrağ, Umman və İ Bıə Ərəbə Əmirətion xarıci vəziron telefoni sohbətış karde.

İroni xarıci vəzarətxonə iğtisodi muavin Ğolam Rıza Ənsari həm votışe sıvoy Tırkmənestan İroni həmmə sərhəddon bo ticarət və iğtisadi əloğəonro ojin.

İroni prezident Həsən Ruhani həm ımruj de İndoneziya prezident telefoni rabitə cərəyonədə bə Koronavirusi şərayeti jentonədə İroni elmiyə inkişof iyən ım noxəşti məhorədə çokə təcrubəon işorə və təkidış karde ki ım sahədə İron və İndoneziya əloğəon bəpe icod bıbu.

Koronavirusi barədə xəbə ome ki İron və Venesoela səhiyyə vəzarətxonə rəsmi şəxson və muavinon miyono video konfrans və internet iclos bərpo be.