De Aşura ruji iyən İmom Huseyn(ə)-i şəhodəti mınosibəti səbəsəloməti.
İron zinə şəviku və de İmom Huseyn(ə)-i şəhodətə şəvi mınosıbəti matəm və ğəmədəy, ımruj 1 şanbə, hicri ğəməri 1442-ə sori Məhərrəmə manqi 10, Aşuraye Huseyni mısibətinə ruje.
Məhərrəmə manqi 10 nə ruj dınyo şiəyon 3 minnə imom şəhidon salar Həzrət imom Huseyn(ə) şəhodəti sorəqardışe ki hicri ğəməri 61 minnə sori məhərrəmə manqi 10 nə ruji 57 sorətiədə kərbəloədə şəhid be.
Həzrət imom Huseyn(ə) kərbəlo ğiyomi barədə iyən Məkkəku bə Kərbəlo tərəf hərəkət karde roədə desbə şəhodəti zəmon oşko votşe: ım hərəkətiku məğsəd bə islami zidd bıə Yəzid hukuməti rısvo karde, əmre be məruf və nəhye əz munkəri bəji karde iyən zılm və sitəmkoron vədə muğavimət kardeye ta islame nabe Muhəmmədi(s) hifz və oqətə bıbu.
Im qıləy məmuriyət və ko be ki mıtəalə Xıdo bə Həzrət imom Huseyn(ə) doəş be ki ə Həzrət həm ım məmuriyəti icra karde xoto Aşura zohrə vaxti nımoji bəpeştə dıştə bəfodorə əshabi bə ico Yəzidiyon ləşkəri vositə şəhid be.
İslamiyə ironi dindarə millət məhərrəmə manqi əyam məxsusən Tasua və Aşuraye Huseyni(ə) şəv və rujədə huseyniyəon və məçitonədə bə əzadarəti karde məşğulin.
Nohə hande, sinə və janci je iyən şəhidon salar və əğə Həzrət imom Huseyn(ə), Ğəməre Bəni Haşim Həzrət Əbəlfəzlil-Əbbas(ə)-i həxədə rozə hande ım əyyomədə bıə islamiyə ironi dindar və Huseyniyə milləti muhimmə bərnamon ku iborəte.
Imsor Koronavirusi xoto İronədə bıə məçidon, Huseyniyəon və təkyəon ıştə əzo mərosimonışon ojə fəzoədə bərpo kardədedən ta bə səhiyyəvi prinsipon həm əməl kon.
İron İslam Respublika Tolışi Rədio Həzrət imom Huseyn(ə) şəhodəti sorəqardışi bə həmmə mıslmonon, dınyoədə ozodtələbon, məxsusən bə həmzıvonə Tolışon səbəsəloməti dodə.
