Yekaterinburqədə əməliyot

İyuni 27-də maştəvo saat 06 nezi, RF Sverdlovsk viloyəti mərkəz-Yekaterinburq şəhərədə huğuğ mıhafizə iyən devlət əmniyətə xıdməti bə cinoyətkoə dastə vəynə əməliyot dəvone xəbə doə bedə.

Cinoyətkoə dastə uzvon çe azərboyconiki bə odəmon be votə bedə. Səhəri curə-bəcurə unvonədə eyni fəxtədə dəvonə əməliyoti nəticədə tosə 50 kəsi dastqir kardə be votə bıboən, peşo çəvon veyni ozod kardə bən. Əməliyotədə bə polison iyən xususu xıdmət qrupi tabe nıbe nəticədə tosə 10 kəsi bə mərəzxonə barde, 6 kəsiən dastqir karde bəyon kardə bə. Dastqir bə xonəxon veyni çe AR Ağdam rayoniku bən. Azərboyconi resurson bın əməliyotədə 5 kəsi marde xəbə bıdonən, realədə bə mərəzxonə eqıniyə xonəxonədə 2 kəs mardə. Rusiya tərəfi dəvonə ekspertizə çəvon marde səhhətə problemi iyən sinin be anqıl kardə. Çəvon meyt iyuni 30-də bə Boku rosniyə bə. RF huğuğ mıhafizə orqanon əməliyati dəvone səbəbi 2001-minə iyən 2011-minə soron çın cinoyətkoə dastə tərəfo dı azərboyconiki bə xonəxo kışte, tosə ışətən koy səpe oj nıbe nuşu doydən. 
RF bəştə vətəndoron vəynə dəvonə əməliyot bə Azərboyconi tərəfo ciddi reaksiya səbəb bə. Azərboyconi bə RF Bokuədə bə səfiri nota edaştəşe, de rusiya mədəni iyən siyosi xəti bın rujonədə nəzədə qətə həmmə eçınon- hətto RF Sər Vəziri mıavin Overçuki bə azərboycon iyən Azərboyconi parlament nımoyəndon bə RF səfər  ləğv kardə bən.