İron iyən məntəğədə bıə Covid-19 vəziyətiku oxonə xəbəron.

9000 nəfəriku vey bə Koronavirusi mıbtəlo bıə kəson tojədən İronədə peydo bin, 232 nəfər de təəssufi mardən.

İroni səhiyyə vəzarətxonə elanış karde: dəvardə 24 saəti mıddətədə 9594 nəfər Koronavirusi tojə noxəş İronədə peydo bin ki çəvonku 1408 nəfər hələ noxəşxonəonədən.

Bə oxonə raporti əsos, İronədə tosə bə ısət 1092617 nəfər bə Koronavirusi mıbtəlo bıən ki dəvardə 24 saəti mıddətədə de təəsufi 232 nəfər Koronavirusi mıbtəlo bıə noxəşon ıştə coni dastiku doəşone ki qırd ısət ım pandemiya nəticədə mardə kəson miğdor bə 51728 nəfər rəsə.

Əmo de xoşbəxtiyəti İronoədə Korona noxəşon miqdoriku 787853 nəfəri hal-əhvol çok be və əvon noxəşxonəonku mırəxəs və ozod bıən.

Əmmo məntəğədə bıə Koronavirusi barədə oxonə xəbəronku həm işarə karde lozime ki, Əfğanistonədə Koronavirusi qətə kəson bə 50000 nəfər iyən çı virusi nəticədə mardə kəson miğdor bə 2000 nəfər rəse holədəy.

Filipin iyən Sinqapurədə həm Koronavirusi pandemiya ijən şiddət peydo kardey barədə niqəranətion vey bıə.

Cənubi Kariya səhiyyə vəzarətxonə həm raportış doə ki fəğət zinə ruj 700 nəfər ım kişvərədə bə Covid-19 virusi mıbtəlo bıən.

Tırkiyədə həm Anti Korona tojə dıvrə qarantin şərayet iyən məhdudiyəton zinə şəviku bino bıə.

Azərbaycan Respublikaku həm xəbə omə ki Korona qətə kəson bə 167155 nəfər iyən virusiku mardə kəson bə 1840 nəfər rəsə.

Dınyoədə Korona qəte kəson miğdor 70 milyon nəfər iyən mardə kəson ədəd həm 1 milyon 590 həzo nəfəriku vey bıə.