De Xanım Həzrəte Fatimə Zəhra(s) şəhodəti ruji mınosibəti səbəsəloməti.
Imruj Hicri Ğəməri Cəmadiul Sani manqi 3 iyən Yanvarə manqi 17-nə ruje, təğvimədə ımruj Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro şəhodəti sorqərdış ğeyd bıə.
Həzrəte Fatimə Zəhra(s) Beesəti 5-nə sori Cəmadius Sani 20 ədə Məkkəədə bə dınyo omə.
Ə Həzrət Hırdənəti faxtiku ıştə qiramiyə dədə Həzrəte Muhəmməd(s) hidoyəton jentonədə de İlahi məərif oşno be, ijən ıştən çı Xıdo dərqah məxsusə bandəon və İlahi elmon sərçəşmə be.
Həzrəte Fatimə Zəhra(s) jimoni həmmə ləhzəonədə isor, səbr, qızəşt, qinaət, səxavət, Xıdo ibadət iyən bə fəğıron komək kardeyku aliyə nımonəon moşahidə kardənin be, həmçenin vey yolə tarix ofəyə şəxsiyətoni bənə İmom Həsən(ə) iyən İmom Huseyn(ə)-i tərbiyə və pırosnişe.
Oxo ə Həzrət 18 sor jimoni bəpeşt çandə zəmonə hakimon zılm və sitəm iyən ıştə qiramiyə dədə Muhəmməde Mıstəfo(s) bəfoti dard-ğəmi xoto bə bəzi rəvayəton əsos Hicri Ğəməri 11-nə sori Cəmadiul Əvvələ manqi 13 iyən bə co rəvayəton əsos Cəmadius Sani 3 ədə şəhid be.
De Həminə matəmə əyyami mınosibəti çı Əhli-beyt(ə)-i aşiğon zinə şəviku və de diğğət bə Korona pandemiya şərayeti Məşhədədə bıə şiəyon 8-nə İmom Həzrəte Rıza(ə) iyən Ğomədə bıə Xanım Məsumə(s) pokə hərəmon iyən co vırəonədə bıə məçidon Huseyniyəonədə əzodorəti mərasimon virtual surəti binoşon karde.
Çandə məxsus mərosimon həm virtual iyən onlayn surəti bərpo bey holədəy.
İroni Rəşt şəhri Tolışi Rədio tərəfiku çı Xanım Həzrəte Fatimə Zəhra(s) şəhodəti sorqardışi bəşımə səbəsəloməti və təsliyət ərz kardədəmon.
