Pars Today

İroni xarıci vəziri muavin votışe: İron bə dınyo mısılmonon ğətlıami tov varde əze ni və ım çı islamiyə kişvəron vahidə vindemone.

Bə İrna raporti əsos, beynəlxalğ və huğuği məsələonədə İroni xarıci vəzarətxonə muavin, Seyd Abbas İrağçi, Malaziyaədə bıə İslami Həmkorəti Təşkilati foğəladə iclosədə Myanmari mısılmonon ğətlıam karde ğəmğinə hadisəon barədə tənğidış kardə ijən həminə iclosi dəvoniye qıləy hədəfonış de Myanmari mısılmonon i bey elan kardə.

Abbas İrağçi bə ım nuktə təkid kardə ki, Myanmari devlət bəpe ısətnə vəziyət iyən bə mısılmunon əleyh jıqu cinoyəton kontorol bıkə ijən təsdiğ kardə: çı mısılmonon və buddiston miyono daveon məzhəbi cəhətiku rişəş ni və Myanmari devlət bəpe bo mısılmunon jimoniro vəziyəti hozzı kə ijən çəvon şahrvandəti problımon həl bıkə.

İroni xarıci vəziri muavin çı İslami Həmkarəti Təşkilati əsosış, Fələstin məsələ həl karde zınəş be və təkid kardə: bə Fələstini məzlumə milləti himyuhə karde vindemonon həm ım devrə iclosədə bəyon bəbe.

Çı İslami Həmkarəti Təşkilati ali eksperton iclos, Myanmari mısılmonon vəzioyəti barədə mızokirə kardero, ijən fələstin məsələ təğib karde xoto ımrujnə sıbi faxti Malaziyaəd bərpo be.

Imruj həmçınin İslamiyə kiçvəron vəziron iclos həm bərpo bəbe.

Myanmari Raxin nomo bıə məntəğə mısılmonon ısət bə 5 sore neziye ki radikal budiston əzyət və cinoyəton vindedən.

Həminə cinoyəton nəticəku, de tosə bə ısət 1000 nəfər mısılmon keşte və 100 həzu nəfəriku vey həm avarə bən.

Myanmari devlət çın kişvəri mısılmonon şahrvandəti həxi ləğv kardə və əvoni miqrant və kuç kardə kəs hisub kardə.