Ayətullah Rəisi: hamsuyəon əmniyət çəmə əmniyəte, İron nəticə mehvərə muzakironış pidə.

İroni prezident zinə şəv ıştə i minnə televeziya misohibə cəryonədə bə hamsuyə kişvəronədə əmniyəti dəvom peydo karde əhəmmiyəti işarəş karde və votışe: tosə bəısət de dınyo iyən hamsuyə kişvəronku bıə 50 nəfər rəsmi şəxson muzakirə karde cərəyonədə bə həmkarion dəvom peydo karde əhəmmiyəti təkid bıə.

Bə İrib raporti əsos, Ağaye Rəisi ın votımonədə bə Əfğanistoni cari vəziyəti həm işarəş karde və votışe: Əfğanistonədə hələkə ro ıme ki qıləy dıvlət de milləti sədo vositə intixob və milləti irodəon hakim bıbu.

İroni prezident bə ın nuktə işarəş karde ki İron həmmişə de Əfğanistoni sulh, oroməti, irodəon hakımiyyət və Əfğanistoni milləti tələbon muvafiğ bıə əlovəş karde: Əfğanistoni milləti iradəku icod bıə dıvlət karde bəzne de İron hə çokə həmkarətiş bıbu.

Rəisi bə dəvarə soronədə iyən Amerkə işğalçiyəti jintonədə bə Əfğanion omə veyə zərəl ziyonon işarəş karde və votışe: Əfğanistoni məsələ nışoş do ki Amerkə iştirok nə fəğət ın kişvər bəlkəm dınyo hiç məntəğədə əmniyəti icod əkə ni bəlkəm əy xərobə kardə.

İroni prezident ətomi muzakirəon barədə həm votışe: muzakirə və votımon bənə diplomatik fəaliyəti əbzare iyən İron çəyku tarsış ni əmmo ğərb və Amerkə fişari jintonədə de İron muzakirə karde pidəşone.

Rəisi əlovəş karde ki İroni təziği jintonədə noe hiç faxt nəticəon bois bə ni və Ğərb vekərə ın məsələ təcrubəş kardə, çənde təhdid-təziği muzakirə karde ğəbul kardənin ni.

İroni prezidentbə yodış varde ki İroni dıvləti votımonon mehvər milləti mənafe və sanksiyaon qırd ləğv kardeye ki çəyku i ğədəm həm bə peşo okırniye coiz ni.

Ağaye rəisi bə İroni iğtisodi əmniyət və stabileti həm işarə və təkidış karde: İronədə sərmoyə noeyro ımruj şərayet kamilə hozzı heste.