Vyana molağatonədə çe AİŞ siyasəti murtəce mahiyyət sənibəton bə oşko beşe.
Bə İroni atom proqrami dair Vyana molağatonədə fasilə bə əməl omə. Avropa İttifaği ım tədbirədə təmsil kardə numayəndə Jozep Borrel`i bəyon kardəşe ki, kali kənoə faktoron hestin ki, ım fasilə zəruri kardedə, hərçənd ki, muğavilə mətn bo ğol kəşe hozoe.
“İran.ru” bə “Middle East Eye” sayti istinadən xəbə dodə ki, AİŞ dəvardə rujonədə çe İroni nati kırniə 2 qılə tankeri 38 milyon dollar məbləğədə nati musadirə karde barədə bə ğəror ome, molağatonədə bə mışğıli səbəb bıə. 11 manq dəvom kardə qəpon qardışədə çe Vaşinqtoni tərəfo co ğeyri – konstruktivə hərəkətonən hestin. Məsələn, əvon bə İroni şirkəton və fərdi şəxson sanksiya ləğv karde, SEPAH-i bənə terrorə təşkilati zıne fikriku dast kəşe pidəşonni. Imən jıqo qıley fikri bə meydon vardedə ki, Baydeni hokuməti Vyana molağaton sabotaj karde məğsədış heste.
Dəvardə cımmə ruji Rusiya numayəndə çe Amerikaru tələb kardışe ki, əqər əvon 2015-minə sori muğavilə bərpo karde məğsədşon hestebu, jəqo bəpe bə İroni əleyh sanksion ləğv bıkardon, Cənubi Koreyadə, Yaponiyadə , İrakədə ki, İroni valyuta sərmayəon səpe ğədəğə noəşone, bəpe ey çe arə peqəton.
İİR Xarici Koon Vəzir Huseyn Əmir Abdillahian de Avropa Xarici diplomariya səvon Jozep Borelli telefonə qəpədə ğeyd kardəşe ki, İbə Ştaton bə nav doə tələbon absurdin, molağaton musbət nəticə doe roədə maneə bə əməl vardedə, çəvon bə nav doə iddiaon hiç qıley məntiği əsas nişone, çunki əvon çand kərə bəyon kardəşone ki, Vyana molağaton de muvəffəğiyyəti bə orəx rəse tərəfdarin, əmo ısət sənibəton bəştə nafkonə cəncələ mevğe oqardedən.
Rusiya Xarici Koon vəzir Serqey Lavroviən de Nuseyn Əmir Abdullahiani telefonə qəpədə ğeyd kardəşe ki, hətto Amerika bə İroni muəssisəon sanksiya ləğv nıkoən, Rusiya de İroni ıştə iğtisadi həmkarəti dəvom bəkarde.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
