İroni prezdent votışe: milləti muğavimət karde xarıciyə kişvəron deşmənçiyə planon vədə lozime.

İroni prezident Doktor Ruhani zinə şəv İroni mədəniyə inğilabi aliy şura iclosdə votışe: çı dınyo imrujne vəziyətədə lozime ki çımiku vey de vəhdət iyən i bey inğilabi hədəfon barde zumand bıbəmon ijən xarıciyə kişvəron bevəcə pılanon vədə muğavimət bıkəmon.

Ruhani təkidış kardə: dəvardə 38 sori mıddətədə İroni milləti muğavimət karde çəmə fəxre boçi ki millət bənə inğilabi i minə ruji meydonədə hestin və deştə zumandə muğaviməti çı islamiyə nizomi hədəfon əməli kardero çandə deşmənon pılanon vədə istiğamət kardəşone. Ruhani çı İroni islamiyə inğilabi vey yolə nəticəonış islamiyə nizom, istiğlal, milliyə hakemiyət və milliyə iradə zınəş be və votışe: ijən ın inğilabi co nəticəon elmi, mədəni və ictimai cəhətiku çandə bə inkişof rəse heste.

Ruhani bə İroni inğilabi bənav İroni dıvləti vəziyət ijən sultə nizomi dastədə bənə əbzor və vəsilə məxsusən Amerika əmron icro karde vəziyət işorəş kardə və votışe: ımruj de islamiyə inğilabi bərəkəti İron çı məntəğə və dınyo vey təsir əkə kişvəre ki de zumandəti həmmə kişvəron bəy ehtırom kardedən.

İroni prezident bə ım nuktə həm işorəş karde ki İmom Xomeyni(r) de hikmət və tədbiri İroni islamiyə inğilabi hidoyətış kardə və votışe: ım ki İroni inğilab qullə vədə vıl hədyəş do boiys be çand ruj çı bəhmənə manqi 22 minə ruji bənav İroni hərbi həvoiyə ğıvvon İmom Xomeyni(r) tono əhdon dəbastən və deştə bəfodorti elan karde Şah rejimi məğlub bıkən.