Dınyo ımruj çe nuə nizami həndəvərədəy.
Dəvardə həftədə İslamə İnğilabi rəhbər Ayətulla Xamenei de İroni universitetə tələbəon vindemonədə ğeyd kardışe ki, bəşəriyyət bə dığutbinə və monoğutbinə nizami bərəks, ısət nuə nizami həndəvərədəy
Im nizamədə keşvəron maşkinə ruji bəpeki ıştə mənafeon təmin kardə imkanədə bıbon. Jıqo vəziyyətədə Amerika İbə Ştaton rujbəruj ıştə zuy qin kardedən. Bə Ukraynadə şə canqiən bəpe nığıl, çe tojə dınyo nizami prizmaku ediəsi. Haliyədə bə əməl omə qıvoninə şəraitədə har keşvər, həmən İslamə Respublika ıştə mənafe və əmniyyəti təmin karde roədə səy kardəninin.
Yolə Rəhbəri ımən bə nəzə rosniəşe ki, ısətnə universiteton çe İnğilabi sıftənə soron universitetonsə fərğ hestışone. Isətnə zəmonədə ıştəndərki və ərzeşi molyəton çe arə barde roədə cəhdon hestin, universiteton bəpe bə ım 2 qılə cəhəti diğğət bıdon. Çunki ıştəndərkiku dast kəşe, həm ideoloji cəhətonku , yəni çe xalği mənəvi molyətonku dast kəşeye, həmən çe keşvəri və inğilabi yolə nayliyyəton əhəmiyyəti saru eğandeye, kali beəhəmiyyətinə nırəsəyon bə nəzər dıjd nişon doe cəhd kardeye. Im çe Ğərbi tojə mustəmləkəçiəti siyasəti məğsəde ki, keşvəri mədəni irsi əhəmiyyəti çe xalği, məxsusən çe cıvonon nəzəro eğando, çeyku bə Ğərbi heqemonçiəti beetina mande hisson perosno. Əve bı koədə tələbəon səpe yolə məsuliyyət eqınidə, təhlilqəron, eksperton, ideoloqonən bəpe ım məsələon muzakirə karde ro muxtəlif məclison təşkil bıkardon.
İslami Rəhbəri Fələstini məsələ barədən izah kardışe ki, təəssufon bıbo, islami hokuməton bı məsələdə bevəc hərəkət kardedən. Əvon hətto Fələstini həxədə qəp je pidəşonni, jıqo qılet səhv fikir bə nav dodən kİ, de sioniston munasibət onoe roy bə Fələstini komək karde mumkun bəbe. Jıqo qıley səhv hələ 40 sor bə nav Misiri hokuməti kardışe. Imi sionistə rejimi bə Fəlstini xalği, bə muğəddəsə Əl-Əqsa məçiti munasibətədə həğarətinə hərəkəton hiçən bə kam nıkardışe. Əmo Fələstini cıvonon, həmən Fələstini xalğ yolə rəşadət nişon dodən, sionistə rejim isə ıştə dasto omə bə har xəzpuşə cinayətə hərəkəton dəvom kardedə, Amerika İbə Ştaton və Avropan bey dastək dodən.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
