Ruhani:ironi milləti cəvob xəbərdarətion vədə ciddi bəbe.

İron İslam Respublika president Həsən Ruhani votışe:ironi millət heç vaxti islamiyə inğilabiku mudafiyə karde ro iyən mərhum imom Xomeyni və islamiyə inğilabi yolə rəhbəri hədəfon bə nəticə rusneyu ıştə vıjniyə bə royku onibəqardən.

İron İslam Respublika president Həsən Ruhani zinə bəhmən manqi 22 nə ruji aksiya mərasimədə tehroni Azadi meydonədə votışe:islamiyə inğilab ironi tarixi muhimmə mərhələy ki məmləkət bə ğəribəon və Amerkə vabəstə mandeku ozod be və milləti tale bə çəvon ıştən dast eqıni.

Ruhani ıştə sıxanon dəvomədə əlavəş karde islamiyə inğilab dınyoədə 1 minnə inğilabe ki çəy millət əçəy təşkil be bəpeştə 2 manqisə bə kamə muddətdə bəştə  nəzədə nıə nizomi bəleşon do.

İron İslam Respublika president votışe: tojə bə vəzifə rəsə  kəson ki məntəğə və amerkədə ğıvvəşon bə dast qətə bıznon ki ironi milləti vədə fəğət bəpe de ehtırom sıxan bıkən.

Ruhani votışe:ironi milləti cəvob bə təziğon ve ciddi bəbe və əlavəş karde  kəsoni ki bə ironi devlət və silahlinə ğıvvə tars dodən oğo bıbon ki ironi millət de muğavimət ğıvvə iyən huşinə hərəkəton həmçinin məntiğ  tarixi muhimmə mərhələonədə ıştənışon nışon doə.

İron İslam Respublika president işarəş karde ki islamiyə Respublika heç vaxti  problem domoədə bə ni və ısət həm ni və ıştə sıxanon dəvomədə əlavəş karde çəmə nıpiyə kəson bə islamiyə İron har qılə təməkarə çəşiku doəro bıbon çun ki İron zumande və heç kəs nibəzne de bevəcə çəşi bəy diyə karde.

president Ruhani votışe:ironi millət islamiyə inğilabi səbarzəti bəpeştə heç vaxti ıştə roş qin kardə ni və beynəlxalğə səthədə təziğinə şərayetonış de sulhinə vəziyyət əvəzış kardə.

İron İslam Respublika president həmçinin bə İR8 santırifiyuq ironi atom alimony rəseku işarəş karde və votışe: desbə dəvardə sori ironi inkişafi vədə bə deşmenon icazə dodə nıbin hətta 1 qırəm  zardə keyk bə iron daxil bıbo əmmo bı rujonədə 350 tonisə ve orani iyən zardə keyk bə İron daxil bə.