Rəisi: de Latin Amerkə kişvəron həmkoəti əlovə kardey çı İroni siyasəte

İron İslam Respublika prezident votışe: İron İslam Respublika siyasət bə muxtəlif iyən mucudə zərfiyəton əsos, de Latin Amerkə həmkoətion əlovə kardeye.

Bə İrna raporti əsos, zinə, İron İslam Respublika prezident, Sed İbrahim Rəisi de Vanesoela nəğliyoti vəzir iyən ım kişvəri prezidenti məxsusə nımoyəndə Ramon Belaskez vindemonədə, işorəş karde ki Tehron-Karakasi miyono rabitəon vey rə bə inkişof rəsey holədəy və əlovəş karde: saxtə rujonədə İron İslam Respublika, Venesoelaro dust be.

İron İslam Respublika prezident təkidış karde: de dustə kişvəron iğtisodi və ticari rabitəon bə inkişof rosniye siyasəti jiədə, İron İslam Respublika streteqia xususi de Latin Amerkə kişvəron həmkoəti səthi əlovə kardeye.

Əv ijən əlovə karde: İron hozzoe ki həmmə baxşonədə xususi ticari, enerji, texnoloqiya, elmi və mudafiə sahəondə de Venezuela ıştə rabitəon hevuj bıko.

Im vindemonədə həmçınin Vanezuela nəğliyoti vəzir iyən ın kişvəri prezidenti məxsusə nımoyəndə Ramon Belaskez, 2 qılə kişvəri rabitəon inkişofiku vey rozi be və təkidış karde ki ım rabitəon xususi iğtisodi, ticari, tranziti və siyasi baxşədə əlovə bıbu.

Vanezuela nəğliyoti vəzir iyən prezidenti məxsusə nımoyəndə həmçınin bə İroni muhəndesi və texniki zumandətion işorəş karde və həminə barədə 2 qılə kişvəri rabitəon hevujəti tələbış kardə.