İron rəyrə bə Rusiyə nat eksport bəkay.

İroni nat vəzir İron və Rusiyə miyono natiyə həmkarionku xəbəş do və votışe: omə 2 haftə mıddətədə İron har ruj 100 hazo barel nat bə Rusiyə sadir bəkay.

İroni nat vəzir Bijən Zənqənə zinə şəv Tehronədə Rusiyə enerji vəzir Əleksander Novaki mıloğatış kardə və votışe: 2 qılə kişvər, rəyrə bo İroni nati bə Rusiyə sadir karde ro qıləy ğərardədi imzo bəkan.

Bə Zənqənə voteyon əsasi har ruj 100 hezi barel xomə nat bə Rusiyə sadir bəbe və Rusiyə həm ixtiyorış heste ki ım nati bə ıştə dıli piyə vırəon sadir və eksport bıkə.

İroni nat vəzir əlovəş kardə: çın sadir bıə nati puli 50 faiz nəğd doe bıdə və əmandəyon çı nati erj və puliku bo Rusiyə məhsolon bə İron varid karde xoto xərc bəbe.

Zənqənə Opek təşkilati dəvardə iclosi cərəyonədə qıləy tarixiyə təvafuği bə dust oməro çı Rusiyə mısbətə rol və təsiriku ğədrdonətiş kardə ijən votışe: Rusiyə bənə Opekədə bıə nati vıjori nəzorət əkə kamisiya uzvi əhdış kardə və bə ğərol omə ki har ruj 300 həzo barel ıştə nati istihsoliku kam bıkə.

Opeki uzvon dəvardə sori Noyabrədə Viyanaədə rozi bən ki har ruj 1 milyono 200 həzo barel ıştə nati istihsoliku kam bıkən