Vəhidi: dışmon çı İroni oroməti bə yande jəyış pidə

İroni daxli koon vəzir çı İroni ğərbi sərhəddon vəziyəti orom vəsvış karde və təkidış be ki dışmon, terroriston iyən separatçion çı İroni bəzi sərhəd şəhron oroməti bə yandı jıə pidəşone.

Bə İrna raporti əsos, İroni kişvər vəzir Əhməd Vəhidi zinə dıvlət kabiniti iclosi kənoədə və jurnaliston cəmədə votışe: İronədə təhğiğ kamissiya icod bıə ta dəvardə çand haftə mıddətədə bıə iğtişoşonku zərəl-ziyən vində kəson və əvoni kui beqinoh ıştə coni dastiku doəşone çəvon və çəvon ailə həx-huğuğ poymol nıbu və mali cəhəto bəvon koməl bıbu.

İroni kişvər vəzir çı zərəl-ziyonon əsli illətış ixtişoşçiyon tərəfo xərobəkə koon və cinoyəton nəticə zınəş be və elanış karde ki har kəs həminə cəhəto zərəl-ziyoni vindəş bıbu vəpe bə kişvər vəzorətxonə muraciət bıku.

Əv İronədə dəvardə haftəon iğtişoşonədə dastqir bıə ətba barədə həm votışe ki hələ çəvon nom iyən kişvəri şahrvandəti barəd xəbəon muntəşir nibəbe.

Əv bə İroni ğanuni əsos cəmaəti icma və mitinq bərpo kardey həxi təsdiğış katrde və əlovəş karde ki: aksiyaon hədəf, zəmon, vırə, bərnomə, icraəkə və cəyədə ğanuni rioyət bey qarantiya barədə bəpe həmmə detalon şəffot elan bıbu.