İroni Xaş şəhrıstoni İmom Huseyn(ə) nomo məçiti sınniyə cımə imomi şəhodət

İroni Sistan və Bəluçıstoni ostaniku xəbə omə ki ın ostani Xaş şəhrıstoni İmom Huseyn(ə) nomo məçiti sınni İmom cımə şəhid bıə.

Bə İrna raporti əsos, xəbəonədə ğeyd bıə ki bə i minnə raporton əsos, Xaş şəhrıstoni İmom Huseyn(ə) nomo məçiti sınni İmom cımə iyən məşhurə alim, muləvi Əbdulvahid Riqi ki pencşənbə ruji de məlum nıbıə şəxson dızdiyə bıə be qıləy cinoyətədə şəhid bıə ki komilə məlumaton peşo elan bəbe.

 Xaş şəhrıstoni İmom Huseyn(ə) nomo məçiti sınni İmom cımə bənə ın ostani vəhdət simvolom zıney bıdə be ki tojədən və bə ın şəhrıston İroni Yolə Rəhbəri nımoyəndə səfəri cərəyonədə votəş be: "əmə çı munafiğon iyən dışmoni planiku aqahimon, əmə ğərəz islom, islomi nizom, İron iyən de şiəyon bıvəti co sıxanımon ni".

Əv bə Sistan-Bəluçestan ostani sınnion iyən şiəyon miyono bıə nezə əloğəon işarəş karde və təkidış be ki: "əmə ın məmləkəti pidəmone, Yolə Rəhbəri çəmə duste, islomi nizom, din iyən islomi nıbey bəpeşt həni ın məmləkət hətto mısılmonon namusi dardi dəvoəkə ni".

 Xaş şəhrıstoni İmom Huseyn(ə) nomo məçiti sınni İmom cımə ıştən votəş be ki dışmonon tərəfo təhdid bıə əmmo təkidış karde ki har kəs ıştə sərhədi mudafiə əkə nıbu namusış ni.