İron və Tacikistoni ticorəti mığdor 190 faiz ozavziyə

İroni qomroki sıxənəvot, İron və Tacikistoni ticorəti 190 faiz ozavziyeku xəbəş do.

İroni qomroki sıxənəvot Sed Murteza Emadi votışe: 1401 minnə sori 8 manqi mıddətədə İron və Tacikistoni ticorəti mığdor bə 140 milyon dollariku vey rəsə ki dəvardə sori muğaisədə vəzni cəhəto, 151 faiz iyən erji cəhəto 190 faiz əlovə bey nışo doydə.

Nati kimiyə məteriyalon, şişə paşmə, muxtəlifə acil, muxtəlifə moy xorəkon, kaştemon iyən boğəvonəti muxtəlifə məhsulon əcumlə İroniku bə Tacikiston ixrac bıə məhsulon be.

Bə Tele-Rədio aqentiyəti raporti əsos, İroni qomroki sıxənəvot ijən əlovəş karde: 1401 minnə sori 8 manqi mıddətədə de Tacikiston, İroni ticorəti mıbodiləon mığdor vəzni cəhəto bə 146 həzo 531 ton əmtəə iyən erji cəhəto bə 140 milyono 498 həzo 455 dollar rəsə.

Emadi ijən votışe: ımsornə 8 manqi mıddətədə və dəvardə sori muğaisədə ticorəti mıbodiləon mığdor vəzni cəhəto 151 faiz iyən erji cəhəto 190 faiz əlovə bıə.

Qomroki sıxənəvot həmçınin votışe: bə Tacikistoni məğsəd İroni məhsulon ixracati mığdor vəzni cəhəto 130 həzo və 69 ton məhsul iyən erji cəhəto 93 milyono 100 həzo 826 dollar be.