Avropa parlamenti anti İron bəyaniyə barədə Əmirəbdullahiyan iyən Boreli telefoni sıhbəton

Avropa parlamenti anti İron ğəyri normal iyən mudalilə əkə bəyaniyə layihə sadir bey bəpeşt, İroni xarıci vəzir iyən Avropa i bemoni xarıci siyasəton ali nımoyəndə de yande telefoni votımon kardışone.

Bə İRİB raporti əsos, İroni xarıci vəzir Huseyn Əmirəbdullahiyan de Avropa i bemoni xarıci siyasəton məsul Cozep Boreli votımonon cərəyonədə çı Avropa parlamenti ğeyri mənteği vindemoni tənğidış karde və əy behisobə səhvə ğərol zınəş be.

Əmirəbdullahiyan əlovəş karde: de təəsufi, Avropa parlamenti jığonə ihsosi, radikal və ğeyri normalə layihə de siyasi iyən ğanuni mənteği ziddiyətış heste.

İroni xarıci vəzir Sepah təşkilati bənə terroristi dastə bə hisob vardeyro Avropa parlamenti tojə ğərol bənə bə Avropa lenqi tərəf qullə ğande bə hisobış varde iyən votışe: İron vey kərə elanış kardə ki Sepah bənə İroni hakımiyəti ğıvvə kişvər və məntəğə əmniyəti oqəteyro xususi de terrorizm mubarizə barde cərəyonədə muhim iyən təiinəkə rolış be.

Əmirəbdullahiyan bə İroni islami şura parlamenti ğanuni və zumandə reaksiya işarəş karde və bə Avropa parlamenti notaş do ki bəştə ihsosi rəftori ağibət fık bıkon və bə diplomatiya, kontroktiv həmkoəti iyən əğlaniyəti təmərkozışon bıbu.

İroni xarıci vəzir əlovəş karde: lozim bəbe ki diplomatiya meydonədə bə mıtəğabilə əmniyəti ehtırom noə bıbu və təhdid iyən ğeyri dustanə zıvoniku istifodə kardey əvəzi mıtəğabilə etemo domuədə bıbəmon.

Avropa i bemoni xarıci siyasəton məsul Cozep Borel həm votışe: əqəçı Avropa parlament bənə mıstəğil təşkiloti əmək kardedə əmo ğəyədə sadir bıə ğətnoməon icra cəhəto ğabeliyətış ni və fəğt çı Avropa niqəronətion nışon doydə.

Əv çı atom sazışi barədə bıə tojə diplomatik fəaliyətonku ıştə rizoyəti elanış karde və votışe: de İron kostroktiv muğavilə bə dast vardeyro bəştə səy-cəhdon idomə bədamon.