İnğılobi Lider:Xısos çəmə milləti tələbe
Pars Tudey-İnğılobi Lider qıləy mesajədə,çe İnğılobi şəhidə lideri təşyi mərosimədə İron iyən İraği xalği iştiroki təğdır kardə holədə təkidış kardə:Əmə şımə pokə xuni və çın dıqlə canqi həmmə şəhidon xuni çı cinoyətkor və beabruyə ğatilonku xısosi sey sıxani doydəmon.
Pars Tudey bə İroni Televiziya Korporasiya istinodən doə məlumoti əsos,İslomi İnğılobi Lider Ayətullah Seyd Mujtəbo Huseyni Xameneyi qıləy mesajədə,"İroni Şəhidə Əğə"təşyi mərosimədə çandə da milyon İron iyən İraği xalği iştiroki səmimi ğəlbiku təğdır kardə holədə,bə milləti şəhidə imomi xitobən təkidış kardə:Əmə şımə pokə xuni və çın dıqlə canqi həmmə şəhidon xuni çı cinoyətkor və beabruyə ğatilonku xısosi seyro əhd basteydəmon.In xısos çəmə milləti irodəy və mıtləğ bəpe bə vırə rosney bıbu.Çəvon siyohi səyku bəpo mevcud bıə cinoyətkoron yonquyədə qıləy dincə maqi orzu deştə bə məzor bəbardeyn.
İslomi İnğılobi Ali Rəhbəri mesaji mətn jıqoe:De Rəhmon və Rəhimə Xıdo nomi
السَّلامُ علیکَ یا ثاراللهِ وَ ابنَ ثاره وَ الوِترَ المَوتور. السَّلامُ علیکَ وَ علی جَدِّکَ وَ اَبیکَ وَ اُمِّکَ وَ اَخیکَ وَ المَعصومینَ مِن وُلدِک.
Həyotəbaxşə ğıyomi nido peyğombərəti missiya yol və barzə əks-sədo çe torıxi diyəroə nığılə vırəku rosnə və deçəy təsiri İroni İslomi İnğılobi icod kardə bə İmomi səlom bıbu.Bə Huseyni əsos bıə və de Huseyni şuoron və ideyalon bə əməl omə və ozavziyə qıləy inğılob.İroni şəhidə əğə həm de ın ideyalon ruşdış karde.Əv,Huseyni be,Huseyni fikış karde və Huseyni hərəkətış karde.Huseyni cihodış karde və mığovimətış nışon doe,Huseyni jimonış karde və çe Huseyni məktəbi royədə xunış eme və şəhid be.Huseyniyon miyono ə kəson heste ki,Huseyni royədə,çe Huseyni(ə) məktəbi və ideyalon royədə məzlumonə çəy xun bəsə zəminisə eməyədə,İslomi millət səfərbər be və bın zəmon bə Aşura və həmonə vırə,bə Kərbəlo dəçıkeydə.ısət həm eyni formədə de Huseyni eşği bəçəmə milləti qıləy nuyə həyotış bəxş kardə və bə Yolə Xomeyni və Şəhidə Xameneyi məktəbi qıləy nuyə cilvəş doə.Im,çe Huseyni(ə) məzlumiyyəti və İronədə,peşo həm İrağədə və diqər kişfəronədə" هَل مِن ناصرٍ یَنصُرُنیِ"nido əks-sədo doə həyotəbaxşə qıləy hay-kuye ki,bə botıli dılədə zəlzələ səbəb beydə.Və vırəş heste de ın mınosibəti,bə İron iyən İraği şəhər və diyonədə,xususən həm Tehron,Ğum,Nəcəf, Kərbəlo və Məşhədədə iştirok kardə, mehtəşəm,torıxi və dışmeni məğlub kardə çandə milyon insoni iştiroki səmimi ğəlbiku ıştə mınnətdoəti nışon bıdom.
Çəmə millət çe Huseyni xunxahəti tələb kardedə.In yolə millət dırozə soron Huseyni royədə və bə Huseyni dışmenon və Huseyni ideyoloqiya ələyh canqədə ıştə fərzəndonışon ğıbonışon karde.ısət həm çəy və çı devri Huseyni xunxahəti tələb kardedən.ısət bəçəmə şəhidə lideri votedəm:Ha məzlumə məğtul ha! Ha səbarzə məzlum ha! Ha çe Xıdo salehə bandə ha! ısət ki,çəmə çəşon de arsi pur bıə və deştə dıl arşiyə bədəni deşmə vido kardedəmon.şımə məktəbi xandi kardey və şımə kəşə rostə ro şey,bın royədə bıə saxtətiyonku nıtarsey və bənə şımə bə Xıdo xoşə xəbon və vədon dıl dəvasteyro əhd basteydəmon.Əmə şımə pokə xuni və çın dıqlə canqi həmmə şəhidon xuni çı cinoyətkor və beabruyə ğatilonku xısosi seyro əhd basteydəmon.Im xısos çəmə milləti irodəy və mıtləğ bəpe bə vırə rosney bıbu.Çəvon siyohi səyku bəpo mevcud bıə cinoyətkoron yonquyədə qıləy dincə maqi orzu deştə bə məzor bəbardeyn.əvo bəpe bızınon ki,ın məsələ çımı və ya diqər məsul şəxson vucudiku bə şıkrə ni.Əmə bıbəmon ya nıbəmon həm,ın məsələ real bəbe və rəyrə çe dınyo har vırəku ozodə insonon har qıləyni ın ilahi missiya i hissə bə vırə bərosne.
Ha çe milləti şəhidə dədə ha,şımə ıştə umri dırozi oruzu kardə şəhidəti şərbəti peşomey bəşmə nəsib be. Şımə inə Zəhroye-Əthori və şımə cədd Əba Əbdullahul-Huseyn və Əbul-Fəzlıl-Əbbosi nışonəon bıə bədəni şəhidəti oləti bə tan kardey bəşmə nəsib bey mıborək bıbu.və ha şımə məzlumə duston ki,deəy bə ico çe dışmeni tərəfiku bə ğəfləti hucumi məruz mandiyon və şəhid biyon.xoş bəşmə holi ki,çandə dəfə çəy mehribonəti və mərhəməton hiss kardə qıləy əğə mehmon bey bəşmə ğısmət be.Har kəs, xususən həmbo çın diyori insononro ilahi rəhməti bıə həmonə cənob ısət şıməş ğəbul kardə və çəy betəhlukə vırə şımə əmnə kə bıə.Və tı,ha Ali məğaminə əğə! Ha Buzurquvar ha! Ha mehrbonə İmom ha! Ha Əbəl-Həsən Ərrıza əl-Murtəzo,çe Xıdo salavat bıbu bətı,ısət ıştı mığəddəs və pokə zoti xıdmətçiyonku qıləyni poə-poə bədən,çandə soron dəvom kardə mıcohidət və beəmonə muborizə bədiqə,deştə xıyzoniku bıə şəhidon bədənon bə ico ki,çəvonku har qıləyni Kərbəlo səhro şəhidon xotırəşon heste,de ilahi əmri aləmi tosə çe aləmi həşi Həzrət Bəğiyyətullah(əc) çı ğeybi avəon peştono bebəşe bə zəmini əhli ilahi rəhməti nuri dətıvnə ruji bın pokə sərəzminədə istirohət bəkardeyn.Umu kardedəmon həmonə ruj,vey rə bome və umu kardedəmon ki,rostəvıjon,şəhidon və evliyaon miyono astovəon de həmonə Həzrəti bəico həmroəti bəkardeyn və umu kardedəmon ki,çəmə şəhidə əğə çəvonku qıləyni bəbe və ijən həm bə Xıdo əhdi sadığəti dəvəşə və sofə səhnəon nımoyiş bəkarde.Bəlkəm həm ın həmroon həm həmonə ruj deəy həmroyəti bəkardeyn. Ha mərhəmətinə əğə ha!Har çi ıştı royədə sərf kardə çəmə əğə və çəy şəhidə həmroon bətı və bəştı lutfi və mərhəməti əmonət kardedəmon ki,əvon dınyo həyotədə ıştı lutfiku çokonə foydəşon barde,çımi bəpeştə həm eyni şikilədə,bəlkəm hətto çəysə həm ziyodə foydə bıbon.Oxoyədə,ijən həm bəçəmə Əğə Həzrət Bəğiyyətullah(əc),təsliyyət doydəm və çın buzurquvor və mehrbonə insoniku bo İroni şəhidə əğə,boçəy şəhidə həmroon və bo qırd şəhidon pokə dıvoon kardey və Barzə Xıdoku bo qırd şəhidon barzə məğominə dərəcə,boçəvon səlomət mandə kəson səbr və mıkofot,bo İroni məzlumə milləti həm fəth və nezə ğələbə tələb kardedəm inşəallah.
