Fransa hərbi təyyarə Ermənistonədə
Fransa hərbi təyyaron bə Erməniston pəre bə adi hol peqardə.
De ADS-B sayti doə xəbə, Fransa Hərbi-kosmos ğıvvon Airbus A-400M təyyarə senyabrə manqi sıftənə rujonədə bə Yerəvan omə. De yolə ehtimoli anons doə nıbə ın təyyarə ome de Fransa səfiri təğyiri anqıle. Ruji bə nav səfarəti bəyonış kardə be ki, nuə səfir Florian Eskudye 2023 minə soriku Ermənistonədə səfir vəzifə icoəkə Olivye Dekotinyeş əvəz kardə. Dekotinye de erməniston-fransa strateje və hərbi həmkoəti və Ğaraboğe məğlubiyətədə de Makroni vositə 2022 minə sori bastə sozişi Paşinyani məsulyət nıbe cəhdon barədə deklarasiyon yodonədə mandə. Nuə səfiri ko navko de əmniyətəti və hərbi anqıl bə. Əv 2010-2013 minə soron çe Fransa Brusselədə NATO ğərarqoədə nımoyəndə, 2017-2020 minə soronədə strateje məsəlon və kiberəmniyətəti departamenti rəhbər, 2023 minə soriku HĞV devlət kotibi mıavin bə.Eskudye bə Erməniston səfir vığande hiçən təsadufi ni. Çəy misiyə Paşinyani hokumətədə ğərb xətti ğoym karde və hərbi həmkoəti zeyf eğande, məntəğədə ıştə mevğeyon zumand karde və Rusiyaku omə de "hibrid təhdidon" mıborizə dığğətədə oğəteye.
