İslomiyə İnğilobi səbarzəti sorəqardışi təbrik

Imruj Şəmbə Şəmsi 1401 minnə sori Bəhmənə manqi 22 minnə ruj( Milodi 2023 minnə sori Fevrali 11 minnə ruj) İroni İslomiyə İnğilobi səbarzəti 44 minnə sorəqardışe.

44 sor çımiku bənav, Hicri Şəmsi 1357 minnə sori Bəhmənə manqi 12 minnə rujədə, (1979 minnə sori Fevrali 1 minnə ruj) İroni İslom Respublika Yolə təsisəkə, Həzrəte İmom Xomeyni(r)15 sor vətəniku diyəro mandey bəpeşt, milləti hərorətinə xoşomey miyonədə, bə İslomi İroni sərzəmin ğədəm noəş be.

10 ruj, Həzrəte İmom Xomeyni(r)-i varid bey bəpeşt, Şəmsi 1357 minnə sori Bəhmənə manqi 22 minnə rujədə( 1979 minnə sori Fevrali 11) İroni İslomi əzəmətinə İnğilob bə səbarzəti rəsə.

Bə çəy xoto, Bəhmənə manqi 12 minnə rujiku yəni bə İroni kişvər, İmom Xomeyni(r)-i varid bey rujiku tosə Bəhmənə manqi 22 minnə ruj ki İslomiyə İnğilobi səbarzəti ruje, "fəcri da rujon" nom noə bıə və har sor həminə əyyomədə, İslomiyə İnğilobi səbarzəti məxsusə mərosim iyən idə şoə mərosiməon bərpo bəbe.

Har sor və Bəhmənə manqi 22 minnə rujədə, İslomiyə İroni həmmə millət əzəmətinə aksiyaədə deştə çand milyonə iştiroki vositə, de İslomiyə İnğilobi hədəfon və İslomiyə İnğilobi Yolə Rəhbəri ıştə bəfodorəti nışoşon do.

İron İslom Respublika Tele-Rədio, İslomiyə İnğilobi səbarzəti sorəqardışi bə həmmə dınyo ozodtələbon təbrik voteydə.