İronədə istehsol, 6.7 faiz əlovə bıə

İroni dıvləti iğtisodi sıxənəvot xəbəş do ki dəvardə 10 manqi mıddətədə, istehsol 6.7 faiz əlovə peydoş kardə.

Bə İrna raporti əsos, zinə Seşəmbə rujədə, və qıləy mətbuatiyə iclosədə, dıvləti iğtisodi sıxənəvot və İroni iğtisodi vəzir Seyd Ehsan Xandozi jurnaliston cəmədə votışe: dəvardə 10 manqi mıddətədə (Milodi 2022 minnə sori Martə manqi 21 minnə rujiku tosə Milodi 2023 minnə sori Yanvari 20 minnə ruj) dəvardə sori muğaisədə, İronədə istehsoli ozavziyə 6.7 faiz əlovə bıə.

Xandozi ijən əlovəş kardə: həminə mıddətədə istehsol baxşədə xodro de 34.5 faiz, parçon de 30.9 faiz, təchizot 29.4 faiz, metal məhsulon 18 faiz iyən damon 10.7 faiz  veyə ozavziyə şomil be.

İroni dıvləti iğtisodi sıxənəvot, həmçınin təkidış kardə ki ticori mıbodiləonədə dıvləti siyasət ıme ki de vey muhimmə şərikon məhəlli vəlutaonku istifodə bıbu ta avro ya dollariku istifodəon bə sıfır bırəsi, əv ijən təsdiğış kardə: tosə ımruj de Çin vey mıbodiləon bə uan əsos be və dollar və avro əvəzi, məhəlli vəlutaonku istifodə kardey de Çini tərəfo himoyə bıə.

Xandozi ijən İroni dıvləti vəluta tojə siyasəton barədə votışe: oxonə manqonədə, İroni milləti deşmənon, tars icod kardey vositə bəzi hərəkəton əncom dodən ki kişvəri daxılədə rəftoron əvəz bey bois bıə.