İron və İraği miyono əmniyyəti mığovilə imzo bıə

De İron və İraği milli əmniyyəti ali şura sərkatibi iştroki vositə, 2 qılə kişvəri miyono əmniyyəti mıştərəkə həmkoətion mığuvilə imzo bıə.

Zinə işəmbə rujədə, hamsuyəti diplomatiya strateqiya təğib kardey dəvomədə, İroni milli əmniyyət ali şura sərkatib, bə İraği paytəxt, Bəğdad varid be.

Bə Təsnim aqentiyəti raporti əsos, qıləy mərosimədə, və de İraği i minnə vəzir, Muhəmməd Şiya Əlsudani, İron İslom Respublika milli əmniyyəti ali şura sərkatib, Əli Şəmxani iyən İraği milli əmniyyət mışovir Ğasım Əleraci iştiroki İron və İraği miyono əmniyyəti mığovilə bə imzo rəsə.

Im muğavilə ki çəy hozzo və imzo kardey prosses çand manq dəvom peydo kardəş be, 2 qılə kişvəri miyono nı piye holədə əmniyyəti  bıhranon mudiriyət və kam karde bıdə, ki veyni Kırdıstoni iğlimədə anti inğilobi qrupon şərrə koonədə rişəş bəbe.

İron İslom Respublika əmniyyəti tyəşkilaton tərəfo ın məsələ təğib kardey nışoş do ki dəvardə soronədə, kali anti əmniyyəti hərəkəton İroni sərzəmini daxılədə de sionist rejimi amilon və Kırdıstoni iğlimədə anti inğilobi qrupon həmkoəti və həmohənqi vositə əncom bıə.

İroni milli əmniyyət ali şura sərkatib bə Bəğdad varid bey bəpeşt, ım muğavilə barədə votışe: de İron və İraği miyono əmniyyəti muğavilə komil surəti icro bey vositə, 2 qılə kişvəri həmmə curnə rabitəon rə bə inkişof bərəse.