İroni Yolə Rəhbər: Amerkə oqınyə iyən heyrətədə mandəy

İroni Yolə Rəhbər çı İmom Rıza(ə)- zairon cəmədə bə məntəğədə bıə Amerkə oqınye iyən herətədə mandey işorəş karde.

Həzrət Ayətullah Xamenei zinə çı Nuyə sori dəme mınosibəti iyən Rəzəvi hərəmi zairon cəmədə hamiyəşe: məntəğədə çı nizomi roy iyən siyosət ruşine iyən əmə çı koy tədbironku aqahimon.

Ə Həzrət votışe: əmmo Amerkə de bezuəti və heyrəti diyə kardə ki əqə məntəğədə bımando bənə Əfğaniston bəpe milləton vey bıə nifrəti jintonədə bə məntəğə tərk karde məcbur bıbu, ki ın koy çəvon mənafe miyoniku bardedə və ın çəvon oşkorə zəifəti iyən oqeniye nışonəy.

İroni Yolə Rəhbər, hərbi peqardımon, siyosi təziğ, media stajış nıbıə hucum, əmniyəti təhdid və iğtisodi maxzimum sanksiyaon çı dışmoni dəvominə xəbisə planonku bə hisobış varde və votışe: tojə dıvrə dışmənətionədə, Amerkə yolon iyən Avropa bəzi kişvəron İronədə bıə dəvardə sori vey kamə iğtişoşonku  himoyədorəti kardışone və de muxtəlif silohin, siyosi, maliyə, əmniyəti və media mudafiyə cəhd kardışone ki məsələn İroni nizomi zəif bıkon, əmmo meydonədə şəroyet çəvon tələbon əks be və İron İslam Respublika həmonə qelobal plani vədə səbarz bıə iyən sobotış karde ki zumand və ğoim mandedə.

Həzrət Ayətullah Xamenei b\ elm və texnoloqia sahədə inkişof və bənə nano, səlomət, səhiyyə, həvo-fəzo, atom enerji, mudafiyə, nati zavot və co baxşonədə bıə İroni çı dınyo barzə vıəonədə ğəror qəte işorə iyən təkidış karde: xarıci əloğəon sahədə həm İroni bə təcrid bardeyro dışmoni səy benəticə be və İron de Asiya kişvəron ıştə əloğəon mıhkəm kardey ijən de məntəğə muhimmə kişvəron bə siyosi, iğtisodi və elmi-texnika həmkoətion hevujəti dəvom doydə.

Ə həzrət əlovəş karde: reqional bəzi muhimmə təşkilot və muğaviləonədə uzviyət və de Afriqa iyən Latin Amerkə həmkoətion zumand kardey xarıci siyosətədə bıə inkişofi coqıləy, eyni holədə əmə de Avropa ğəhr nimon və əqə əvon Amerkəku təbəiyət kardeyku dast bıkəşon de əvon həm ko bəkamon.