Huccətul islom Seddiği: Amerkə pidəşe İslomi məhv bıko

Tehroni cımə nımoji xətib, İslom və İnğilobi məhv kardeyro bə Amerkə xəbisə planon işorəş karde iyən votışe: Amerkə həmişə cəhd kardedə ki de təbliğon vositə, milləti bovəon əvəz və çəvon fikədə nıfuz bıko.

Bə İran Peres aqentiyəti raporti əsos, dəvardə haftə Tehroni cımə nımoji xotbəonədə, Huccətul islom vəlmuslemin Kazım Seddiği təsdiğış karde: islomiyə inğilobi səbarzəti əvvəliku tosə bə ısət, Amerkə canq, sanksiya, terror, ğovmon miyono ixtilof icod kardey, de mınofiğon royku noəmni icod kardey iyən muxtəlifə iğtişoşon və fitnəonku istifodəş kardə, jəqo ki Pozə fəsli fitnədə, tərkibi canq de həmino roy icod be və həmmə istikboriyə kişvəron de yande bə ico bıən ta islomi nizomi məhv kon.

Tehroni cımə nımoji xətib ijən əlovəş karde: Amerkə hətto islomiyə inğilobi məhv kardeyro, ıştə proqonozonədə təbliğoti əbzaronku həm istifodəş kardə ta milləti bovə və etığadonədə nıfuz bıko, və İroni millətiku, imon, ıştəni bovə kardey və istiğloli rohiyə bıqəto.

Huccətul islom Seddiği təkidış karde: dəvardə 44 sori mıddətədə, İron de əliləkə təhrimon, sanksiyaon və muxtəlifə nohəxə terroron vucudi, ijən vey bə inkişof rəsə.

Tehroni cımə nımoji xətib ijən təsdiğış karde, de xarıci təziğon iyən tərkibiyə canqi vıcudi, tosə bə ısət, İroni 13 minnə dıvlət, bə çəşəçi muvəffəğiyəton rəsəşe ki de milləti bəsirət və himoyəon vositə bə dast omə.