Ğərb əsosədə çı insonə həxon dışmone

İroni Yolə Rəhbər təkidış karde ki bəşər həxon barədə iddio hiç curnə şərayetədə bə ğərbion damedə ni.

İmom Həsən(ə)-i milad sorəqardışi şəvədə İroni parsi zıvoni ustadon iyən şairon de İroni Yolə Rəhbəri vindemon kardışone.

Həminə vindemonədə Həzrət Ayətullah Xamenei təkidış karde: ğərbion insonə həxon bardə iddio iyən obraz İŞİD, bəji bəji insonon sutne, ya xod munafeğin iyən Səddamiku himoyə dorəti karde və Fələstin iyən Ğəzzədə bıə cinoyətonədə muşahidə kardənine.

Ə Həzrət çı Tehroni xiyobononədə mumenə cıvonon kışteyku ğərbion himoyəon insonə həxonku ğərbi pesoxtə iddion co qılə nımonə bə hisobış varde və əlovəş karde: çəmə vey pokə cıvonon bənə Arman Həğverdi və Ruhullah Əcəmiyan de işkəncə və de ğrbi mediaon təhrik iyən təlimi kıştə bıən.

Həzrət Ayətullah Xamenei bə dışmon, çəvon hədəf-şivəon zıney əhəmmiyəti işorə və əlovəş karde: çı deşmoni namə canqi baxşon zıney bo həmmə kəson lozimə məsələy əmmo mədəniyət iyən hınə fəalonro vey lozim bəbe ta həm ıştən be hərəkət nımandon və həm co kəson bə dışmoni səy-cəhdon aqah bıkon.

Ə həzrət İronədə bıə veyə xoşğəlb, momen iyən inğilobi şairon vucudiku ıştə rizoyəti elanış karde və votışe: şairon ruhiyə de ihsos və atifə bə icoe əmmo məsələon vədə bəpe ihsosiku bə kəno de fik iyən dırıstə zıney və səhnəşenosi ıştə koy və vəzifə de hınə ənncom bıdən.

İroni Yolə Rəhbər bə vey saxtə şərayet əcumlə monğolon həmlədə Farsi zıvoni sərmoyə iyən rişə oqəte işorə və əlovəş karde: əlbətə ımrujnə monğolon yəni ğərbion de tafot kardə hucumi ki əlovə bə istismor zəmonədə siyohə cinoyət torixi cəhəto bəy işorə karde bəbe, ıstnə zəmonədə həm de cındoə sıpəoni bənə səddomi bə kimyavi silohon təchiz kardey vositə bə İron həmlə karde zəminə icod kardeşone və ısət həm de sanksiya bə həminə həmlə məşğulin.

Ə Həzrət dəvo-damon sanksiyaon və de muxtəlif bəhonəon bə İron peyvənd nıdoey çı ğərbion anti İron sanksiyaon coqılə nımonə bə hisobış varde və votışe: əqə çəvon dastədə İroni milləti vəşiyanətti doe imkon bıə be əvon milləti çı xorəkiku həm məhrum əkin.

Həzrət Ayətullah Xamenei bə İron bıə bədxahon hucumi co baxşi media hucum və du iyən şantaj və inhirofiro çand həzo media istifodə kardey zınəş be və hamiyəşe: ın hucumiku dışmonon hədəf mərifət iyən fik zumandə nuğtəon iyən istiğlok və milli vəhdət iyən muğavimət ijən islomi əməli zəif kardeye.

Ə həzrət çı jeni dindorəti zəif kardey bən dışmonon anti İron hərəkəton co baxş zınəş be və bə İroni islomi inğilobi səbarzəti və çəy bəpeşt bıə jenon rol və təsiri əlovəş karede: İronijə jenon barədə ğərbion rəhm və çəvon həxon oqəteyro diğğətışon ni bəlkəm İronıjə jenonku kin-kudurətşone və de duəvujəti ıştəni bənə jeni ozodəti iyən həxı tərəfdor elan kardən.