İroni ğovmon miyono i bemon həmmişə çı dışmonon xəbisə plani botilış kardə

İroni prezident zinə İroni Xuzıston ostani kuçəkə ğəbiləon yolon cəmədəd votışe: Xuzəstoni ğovmon, şeyxon iyən kuçəkə toyfan miyono vəhdət iyən i bemon həmmişə çı dışmoni xəbisə plani məhvış kardə ki ın məsələ bəpe daimən dəvomış bıbu və çəy zuman kardey lazime.

Bə İrna raporti əsos, Seyd İbrohim Rəisi həminə vindemonədə ki Əhvazi İrşod məçitədə bərpo be bə Xuzıstoni milləti renc-əzobon ki dəvardə 40 sori mıddətədə xususi 8 sornə muğəddəsə mudafiyə zəmonədə zov vardəşone işorəş karde və votışe: ımruj bəpe kişvəri həmmə yolon bə ın ostani bəfodorə milləti xidmət kəmon.

Rəisi bo cıvonon ko icod kardey çı ostani vey muhimmə koy zınəş be və votışe: çın ostani mudiriyətədə bumi şəxsonku istifodə kardey lazime iyən ostanədə bıə şirkəton bəpe çı Xuzıstani cıvononku istifodə kardey ıştə fəaliyətədə nəzərdə bıqəton.

Əv bə dəvardə sorədə bıə Xuzıstoni ov problemon işorəş karde və təkidış be: de xuşbəxtiyəti və de çokə mudiriyəti həmonə problem ki ostani ıştə təsiri jintonədə ğəror dodə be sə kardə bıə iyən əy həl kardımone.

İroni prezident çın ostani behon və cəm bıə muşkilaton həl kardeyro bə cihodi hərəkəton işorəş karde və təkidış be:  Xuzəstoni ğovmon, şeyxon iyən kuçəkə toyfan miyono vəhdət iyən i bemon həmmişə çı dışmoni xəbisə plani məhvış kardə ki ın məsələ bəpe daimən dəvomış bıbu və çəy zuman kardey lazime.

Rəisi votışe: çıme vey muhimmə fəxr bə milləti xidmət kardeye iyən İroni millət və Xuzıstoni mərdumi problemon həlliro hiç koyku diro nibəbem və ğiflət nibəkam.

Həminə səmimi vindemonədə Xuzəstoni ğovmon, şeyxon iyən kuçəkə toyfan həm bə vəhdəti təkid kardey kənoədə çı xuzıstoni problemon həlliro bə inğilobi dıvləti komək kardey təkid kardışone.