İroni prezident: məntəğə və beynəlxalğ veyə təhəvulaton, karde zınəşon nıbe ki bə Tehron-Dəməşği bıvəti rabitəon təsir bınə
İron islom Respublika prezident terrorizmi vədə iyən noəmni saxtə dıvroni dəvardeyku muğaviməti cəhbə və Suriyə millət iyən dıvləti səbarzətiku ıştə rizoyəti elanış kardə və votışe: məntəğə və beynəlxalğə veyə təhəvulaton, bə Tehron-Dəməşği bıvə rabitəon təsirış bəni.
Bə prezidenti məlumatrosniye mərkəzi raporti əsos, İron İslom Respublika Prezident Seyd İbreym Rəyisi İron və Suriyə ali heyəton mıştərəkə iclosədə ki de çəy və Suriyə prezident Bəşar Əsədi rəisəti bərpo bıə, votışe: İron və Suriyə vırə həx bey, de muğavimət və ağılmandəti çərçivədə həmohənqion subit bıə və həmonə kəson ki tosə zinə Suriyə barədə İroni nəzəon və siyasətədə şək-şobhəşon be, etığad peydo kardışone ki çı İroni ım nəzəon de həx və ədoləti bə icoe.
Rəyisi ijən Suriyə oroməti və stabiləti sulhi bə vırə rosniyero bə İroni koməkon və himoyəon təkidış kardə və votışe: jəqo ki İslomi Respublika de terrorizm mubarizə bardeyədə Suriyə millət və devləti kənoədə mande, inkişof və obod kardey baxşədə həm ıştə Suri bıvəon kənoədə bəmanden.
Suriyə prezident Bəşar Əsəd həm Suriyə saxt və bıhroniyə rujonədə, ım kişvəi millət və devlətiku, İron İslom Respublika himoyəon və nəzəonku ğədrdonətiş kardə və votışe: Suriyə millət və devlət, İroni koməkon və məhəbbəton yodiku nibəbarden.
Suriyə prezident həmçınin Suriyə stabilə sulh və əmniyyəti bərğəror kardeyədə, iyən Suriyə canq məntəğəon obodon kardeyro İron İslom Respublika veyə roli ifo bey tələbış kardə.
Bəşar Əsəd ijən təsdiğış kardə: İron və Suriyə rabitəonədə, veyə təcrubəon heste, boçi ki hətto saxtə dıvrononədə və Miyonə şərğ məntəğədə de əmniyyəti və siyasi şiddətinə tufanon vucudi, ım rabitəon bə stabiləti əsos dəvomış be.
İron və Suriyə prezidenton bə 2 qılə kişvəri miyono bıə həmkoəti sənədon imzo bey işorəşon kardə və 2 qılə millət və məntəğə co milləton mənafe təmin kardey cəhəto, bə "İron İslom Respublika və Suriyə Ərəbi Respublika dıroz mıddət və stratejikə həmkoətion komilə bərnomə" əhəmiyyəti təkid kardışone.
Zinə Çoşəmbə, İron İslom Respublika prezident bə Suriyə prezidenti rəsmi dəvəti əsos, de ali heyəti bə ico bə Dəməşğ varid bıə.
