Rəyisi: muğaviməti cəhbə, zumandəti balansi əvəz kardey holədəy

İron İslom Respublika Prezdent de işorə bə muğaviməti səbarzətion votışe: ımruj muğaviməti cəhbə, nə fəğət işğal bıə sərzəminonədə bəlkəm məntəğə və hətto beynəlxalğə baxşonədə ğudrəti balansi əvəz kardey holədəy və şəroyeti bəştə mənafe iyən bə sultə cərəyoni ziyon əvəz kardey holədəy.

Bə Prezdenti məlumatrosniye mərkəzi raporti əsos, Tehronədə, İron İslom Respublika Prezdent Seyd İbreym Rəyisi Həmasi siyosi təşkiloti yol İsmail Hənyə iyən ım təşkiloti kali rəsmi şəxson vindemonədə, Fələstini muğaviməti cəhbə oxonə muvəffəğiyəton təbrik votey bəpeşt təkidış kardə: ım səbarzətion nışoş do ki ımruj əməli təşəbbusi ım cəhbə dastədəy, əv ijən votışe:komil surət oşkoe ki ımruj muğaviməti cərəyon har zəmoniku, vey zumand iyən ım cəhbə deşmonon har zəmoniku, vey zəifəti vırədə ğəror qətəşone.

Rəyisi ijən əlovəş kardə: muğaviməti cəhbə səbarzətion həmçınin oşko iyən subit kardedə ki həmonə şikilon ki sioniston cəhd kardedən ıştə iddio bıə mudafiə zumandətionku nışo bıdən, həğiği ni.

İron İslom Respublika prezdent ijən bəyonış kardə: Fələstinədə cihodi muxtəlifə qrupon i bey iyən ittifoğ muğaviməti boydəği jintoədə, qııləy ilohiyə hədyəy ki bəpe əy oqətey və çəy inkişofiro cəhd bıkəmon.

 Əv ijən təsdiğış kardə: ımruj hətto həmonə kəson ki muzakirə və de sionist rejimi muzakirə dumoədə bin, nığıl surət bə ım təhlil və nəticə rəsəşone ki de ım pesoxtə bıə rejimi muzakirə kardey hiç foydəş ni və de ım rejimi muğabilə kardey yeqanə roy muğaviməte.