İsveçədə bə Kərimə Ğıroni be ehtıroməti kardey, İroni tərəfo məhkum bıə

İroni xarıci vəzorətxonə sıxənəvot, İsveçədə bə Kərimə Ğıroni be ehtıroməti kardey məhkumış kardə və votışe: İsveçi devlətiku intizor ıme ki bə muğəddəsəçiyon be ehtıroməti kardey tikrori vəy bıqəto və ciddi surət ım ko barədə cəvob bıdə.

İsveçi devlət bə ım kişvəri qıləy şahrvandi tələbi əsos ki tələbış kardə be Ğıbonə idə rujədə Ğıroni otəş bıjəno icozə muntəşirış kardə və ıştə ım ğəroliku mudafiə kardəşe.

Həminə cəhətədə və bə İrna raporti əsos, Pencşəmbə rujədə İroni xarıci vəzorətxonə sıxənəvot, Nasır Kənani bə ım be ehtıroməti reaksiya nışoş do və votışe: bə osmoniyə muğəddəsəçiyon be ehtıroməti kardeyro zəminə soxtey xususi de İslomi umməti muğəddəsə əyyom və Həcci qlobal iclosədə mısılmonə milyoniyə qırd bemoni həmzəman, qıly təhrik icodəkə və ğeyri ğəbul kardəninə hərəkəte.

İroni xarıci vəzorətxonə sıxənəvot ijən işorəş kardə: bə osmoniyə kitobon be ehtıroməti kardey, vızməti və nifrət icod kardeyku qıləy nımunəy və de insoniyə həxon vey muhimmə erjon zidde.