Bə Amerkə İroni xarıci vəzorətxonə sıxənəvoti nota

Fars dıyoədə harcurnə hərəkəti barədə, İroni xarıci vəzorətxonə sıxənəvot bə Amerkə ştat nota doşe.

Dışəmbə ruji xəbəiyə iclosədə və İran Peresi jurnalisti cəvobədə bə Fars dıyo əmniyyəti oqətey bəhonə Amerkə ğırəkə təyyorəon vığande iddio barədə, İroni xarıci vəzorətxonə sıxənəvot, Nasır Kənani votışe: məntəğə əmniyyətədə Amerkə ro hiç vaxt sulhomiz nıbe.

Kənani ijən əlovəş kardə: Amerkə tojə hərəkəton konstraktiv ni və ım hərəkəton dəvom doey karde bəzne Fars dıyoədə həssosiyəton əlovə bıko.

İroni xarıci vəzorətxonə sıxənəvot ijən təkidış kardə: İron harcurnə hərəkət ki məntəğə əmniyyəti təsir bınə diyə kardedə və ıştə marzon nezədə bə harcurnə hərəkət həssos heste.

Kənani ijən marzon əmniyyətədə bə İroni silohinə ğıvvon veyə huşinəti işorəş kardə və votışe: İron həxış heste ki harcurnə lozimə hərəkət əncom bıdə.

Kənani ijən təsdiğış kardə: bə amerkə devlət çəmə tovsiyə ıme ki məntəğədə harcurnə ğeyri konstraktivə hərəkətiku vəy bıqəto.

İroni xarıci vəzorətxonə sıxənəvot ijən təsdiğış kardə: Fars dıyo kişvəron mıştərəkə mevzo, məntəğə əmniyyəte və bə həmmə kişvəron həmkoəti ehtiyocış heste və intizor ıme ki ım barədə co qılə hamsuyəon bə mığobilə tərəf lozimə notaon bıdən.