Bə İroni əleyh tojə sanksiyaon əks nəticəonış heste.

İroni xarıci vəzir votışe: əqə Amerkə ujnən bə İroni əleyh tojə sanksiyaon təsdiğ bıkuy siyasi və iğtisodi sahədə əks nəticəonış heste.

Muhəmməd Cəvad Zərif de Əlməyadin Televeziya kanali mısohibə cərəyonədə bə İroni əleyh jıqo icboriyə təhrim və sanksiyaonış be foydə zınəş be və votışe: bə çəmə vindemoni əsos həmonə amil ki boyis bıə Barak Obama dıvlət de İron ətomiyə muzakirəon bino bıkə İroni sadiğ mande imtiovon karde nebe bəlkəm əvon çok oğo bıən ki bə İroni zidd həmmə roon imtovon karde hiç foydəş ni.

Zərif təsdiğış kardə: Amerkə iğtisodiyə sanksiyaon ne ın ki bə İroni iğtisodi vəziyət hiç təsirış nebe bəlkəm siyasi sahədə həm i tərəf ğərbion dasti tili bey ijən ətom enerji sahədə İroni bə na hərəkət karde boyis bıə.

Əv bə siyonist rejim və Ərəbistoni oşkorə maneon ijən bevəcə hərəkəton İron və 5+1 qrupi muzakirəon miyono icod karde işorəş karde və votışe: muzakirəon bə oxo rəse bəpeştə həm ım 2 qılə rejim Amerkə kanqres və co vırəonədə nıfuz karde xoto həmonə təvafuği məhdud karde və ya xot çəy vədə mane icod kardero cəhdışon kardə ki muvəffəğ nebən.

İroni xarıci vəzir məntəğə və dınyoədə vey ətomiyə təhdid və xətəri siyonist rejim hisobış kardə və votışe: siyonist rejim bənə Fələstini milləti həxon ləğv əkə dınyo ətomiyə bombaon xıvand bıə rejime ki bənə qıləy yolə təhdid hisob bıdə ki çandə bə həmmə milləton əcumlə Livan, Fələstin, Yardaniya, Suriyə və hətto Misiri əleyh cinoyəton mırtəkib bıə.

Zərif məntəğədə Tırkiyə kişvəri bənə qıləy muhimmə kişvər hisobış kardə ki çəmə hamsuyə heste və votışe: ım kişvər bəbe bə Suriyədə terroristiyə qrupon dast siloh və pul iyən co imkanaton rəse vədə mane bıbu və ım hərəkət bəzne çı Ankara dıvləti mehvəriyə siyasət bıbu.

İroni xarıci vəzir de Tırkiyə kişvəri 2 tərəfiyə rabitəon məxsusən ticarət sahədə rabitə və əloğəon ziyod kardero İroni hozzo mandeku xəbəş do və votışe: İron ticarət, tranzit və iğtisodə de Tırkiyə vey çokə rabitəonış heste.