İroni prezdent: İron və Vyetnami milləton, mıştərəkə mıstəğıləti iyən həxtələbəti ruhiyə soybin

İroni prezdent, Vyetnami milli parlamenti yol, Vonq Din Hoe və çəy bə ico bıə heyəti vindemonədə, de işorə bə İron və Vyetnami 50 sorə kanə rabitəon bəyonış kardə ki İron və Vyetnami milləton, mıştərəkə mıstəğıləti iyən həxtələbəti ruhiyə soybin.

Bə İrna raporti əsos, zinə əsrədə Ayətullah Seyd İbreym Rəyisi, ım vindemonədə bəyonış kardə: de sanksiyaon və təhdidon vecudi muxtəlifə baxşonədə əcumlə elmi, texnoloqiya, istehsol və sənaye muxtəlifə baxşonədə İroni yolə inkişofon, ım sanksiyaon be təsir kardeyro və bə istehsol iyən ticorəti ozavziyə təmərkoz kardey bə İroni milləti barzə qəmon işorəş kardə iyən votışe: bə İron, Vyetnami parlamenti yoli səfə karde bəzne əlovə bə parlamenti rabitəon inkişof, 2 qılə kişvəri ticori və iğtisodi rabitəon inkişofədə vey muhimmə roli ifoko.

Prezdent ijən məntəğə iyən beynəlxalğə həmkoətion baxşədə 2 qılə kişvəri rabitəon inkişofi vey muhimm zınəşe və əlovəş kardə: mumkin heste ki kali milləton 2 qılə kişvəri rabitəon inkişofiku rozi məbun əmmo ə çi ko əhəmiyyətış heste, 2 qılə kişvər və milləti mənafe təmin kardey cəhətədə təsirinə hərəkətone.

Im vindemonədə ijən Vyetnami milli parlamenti yol, əm kişvəri iminnə vəzir və prezdenti qamə səlomi bə Doktor Rəyisi rosnişe və bəyonış kardə: 2 qılə kişvəri rabitəon zumand və inkişofi cəhəto, parlamenti, ticori, mədəni və təlimon, investesiya və məhkəmə baxşonədə çokə sazışon əncom bıə. əv ijən əlovəş kardə: Vyetnam de İron həmmə tərəfiyə həmkoətion və rabitəon inkişofiro və ım rabitəon bə məntəğə və beynəlxalğə həmkoətion səth rosneyro hozzoe.