De Xanım Həzrəte Fatimə Zəhra(s) şəhodətə ruji mınosibəti səbəsəloməti.

Imruj Hicri Ğəməri Cəmadiul Əvvələ manqi 13 iyən Noyabrə manqi 27-minnə ruje, bə təğvimi əsos iyən bə bəzi rəvoyəton əsos, ımruj de Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro şəhodəti sorqərdışi bərobəre.

Həzrəte Fatimə Zəhra(s) Beesəti 5-nə sori Cəmadius-Sani 20 ədə Məkkəədə bədınyo omə.

Ə Həzrət Hırdənəti faxtiku ıştə qiramiyə dədə Həzrəte Muhəmməd(s) hidoyəton jentonədə de İlahi məərifon oşno be, ijən ıştən çı Xıdo dərqah məxsusə bandəon və İlahi elmon sərçəşmə be.

Həzrəte Fatimə Zəhra(s) jimoni həmmə ləhzəonədə isor, səbr, qızəşt, qinaət, səxavət, Xıdo ibadət iyən bə fəğıron komək kardeyku aliyə nımonəon moşahidə kardənin be, ijən vey yolə tarix soxtə şəxsiyətoni bənə İmom Həsən(ə) iyən İmom Huseyn(ə)-i tərbiyə və pırosnişe.

Oxo ə Həzrət 18 sor jimoni bəpeşt çandə zəmonə hakimon zılm və sitəm iyən ıştə qiramiyə dədə Muhəmməde Mıstəfo(s) bəfoti dard-ğəmi xoto bə bəzi rəvayəton əsos Hicri Ğəməri 11-nə sori Cəmadiul Əvvələ manqi 13 iyən bə co rəvayəton əsos Cəmadius Sani 3 ədə şəhid be.

De Həminə matəmə əyyami mınosibəti çı Əhli-beyt(ə)-i aşiğon zinə şəviku və de diğğət bə Korona pandemiya şərayeti Məşhədədə bıə şiəyon 8-nə İmom Həzrəte Rıza(ə) iyən Ğomədə bıə Xanım Məsumə(s) pokə hərəmon iyən co vırəonədə bıə məçidon Huseyniyəonədə əzodorəti mərasimon virtual surəti binoşon karde.

İroni Rəşt şəhri Tolışi Rədio tərəfiku çı Xanım Həzrəte Fatimə Zəhra(s) şəhodəti sorqardışi bəşımə səbəsəloməti və təsliyət ərz kardədəmon.