İroni bə seonist rejimi Ğəzzədə genosidi oqətey bıə təkid

İron İslom Respublikə xarici koon vəzir bə seonist rejimi Ğəzzə tanqədə genosidi oqətey təkidış karde.

Seonist rejim 2023-ə sori oktyabri 7-ə rujiku etıborən de ğərbi kişfəron tam himoyə iyən de beynəlxalğə təşkiloton sukuti bə ico Ğəzzə tanqədə və İordan ru ğərbi sahilədə bemudafiyə və məzlumə Fələstini milləti ələyh kutləvi ğətlı-am əncom doydə.

Seonist rejim bə ço manqi neze ki, vey muasirə silahonku, ə cumlə canqi təyyorəon,bepilotə pəremoni aparatonku,tankon və hər curnə muasirə rəket və bombaonku istifodə kardə holədə bə Ğəzzə tanqəş hucum kardə ki,çəvon veyni Avropə və Amerka devləton istehsol kardə silohonin.

Bə Fələstini Səhiyyə Vəzərotxonə oxonə statistikə əsosən,seonist rejimi bə Ğəzzə tanqə hucumon sıftəku tosə ısət bə 26 həzo nezi fələstinıj şəhid bıə,64 həzosə ziyodə inson həm zəxmin bıə.

Bə tele-rədyo xəbə agentəti cımə şəvi doə xəbə əsosən,İron İslom Respublikə Xarici Koon Vəzir Huseyn Əmir Əbdullahiyan Nyu-Yorkədə de ABC Nyuz telekanali musahibədə, Ğəzzədə tuməbıri oqətey vocibətiş təkid karde və Ğəzzə tanqədə iyən Sıə dıyo əmniyyəti təmin kardeyış lozım zıne və ımonış vote:Yəmənıjon bə dıyo və kəşti romey əmniyyəti bovəşon heste;əmmo əvon bə fələstınıjon dastək doə holədə,çı seonist rejimi Sıə dıyo ovonədə bə çın rejimi porton şıə kəştiyon oqətey ğərol oməyn ki, ımhəm qıləy cəsurə ğərore.

Əmir Əbdullahiyan Ğəzzə tanqədə beqınoə insonon kışteyədə çı AİŞ bə seonist rejimi silohi dastəkış tənğıd kardə holədə,İron İslom Respublikəbə bə məntəğə sabitəti iyən sulhi oqordıneyro səyon işorə kardə holədə,ğeydış kardə: de ın roy İron de terror qrup bıə DAİŞ-i mubarizə bardəşe və İrağ iyən Suriyədə çandə sorone ki,İroni həmməysə çokə hərbi məsləhətçiyon bın məmləkətonədə çı terroriston tərəfiku şəhid bıən/