Məkkə rəyis,Seyyide Bətha həzrəte Əbu Tolıb(ə)

Məkkə rəyis,Seyyide Bətha həzrəte Əbu Tolıb(ə)

Məkkə sərzəmin Milodi 535-ə sori çe İbreym Xəlili suloləku bə qıləy hırdəni təvəlludi şoyd be.qıləy hırdən ki,nezə ayəndədə bəpe Əv,qıləy alicənobi himoyədor iyən çe eşğ və imoni nəslikuye ki, bə həmmə hestemoni aləmi çe pəyğombəron xatəmi mıhi həkk bıko.çəy pı Əbdul-Mıtəllıbi çəy nomış Əbdul-Mənaf noşe və Əv,de Əbu Tolıbi nomi şehrətış pəydu karde.

Islomi bənav bıə ərəbon de ğətl,ğarət iyən canqi məşğul bin.çəvon veyni mırdolə qujd hardedəbin iyən çe şətov,zino iyən bexəloğətiku ləzzət bardedəbin.əmmo Əbu Tolıb hejo ıştə nevcıvonəti zəmoniku de kəromət iyən alicənobəti çe Ğureyşi nəzdədə məşhur be,ıştəni çın qınonku bə diyəro oqəteydəbe.Əv,bənə ıştə dədə-bobon şərovi peşomey həromış kardəbe,bıtpərəstətiku bə diyəro be və çe harcurnə nopəkətiyon,ğətl iyən cinoyətonku bə diyəro mandedəbe. çoko ki,ıştə cıvonəti zumandəti zəmonədə bə qıləy məğami rəse ki,Ğureyş boştə ixtilofon həll kardero əy hakim ğərol doydəbin.havaxti bə qıləy şəxsi zulm kardə beydəbe,bəy rucu iyən ovard kardedəbin iyən hakəs ki,fəğır be bəçəy baxşeş kardə dərqo səmt dim qəteydəbin və əvon hiçvaxti məyus iyən təyə dast çəyo oqardedənıbin.qıləy zəmon ki,voş voyedənıbe,millət bəçəy dovnə çanq jeydəbin və bo Xıdovəndi dərqoyədə dıvo kardero çəyku koməq kardedəbin…..

Əbu Tolıb bəştə xısusi imtoyozon xoto və bəştə pı vəsiyyəti əsos,çəy vəsiy iyən canişin be.Əbdul-Mıtəllıbi çand qılə zoonış hestebe,əmmo maqi zəmonədə ğərəz Əbu Tolıbi hiçki bo Muhəmmədi(s) himoyə kardero qıləy ləyoğətış nıbe.Muhəmməd(s) çe Əbu Tolıbi taniyə bıvə Əbdullah yeqanə zoə be ki,çəy pı çəy bə dınyo omey bənav çe dınyoku şıəbe.Əbdul-Mıtəllıbi bəy jıqo vəsiyyətış karde:”Əbu Tolıb!bətı Muhəmmədi nığo doey iyən muhofizə sıfarış kardedəm və əy bətı aspardedəm”.Əbdul-Mıtəllıbi ijən bə Əbu Tolıbi dimış qəte və voteşe:”ha Əbdul-Mənaf ha!çe ikəsi oqətey ko bətı aspardedəm ki,bənə ıştə pıə vohidə Xıdo pərəstış kardedə.Əv,qofoyədə ıştə pış dasto doe və mı boəy bənə qıləy dıləsutə inə bim ki,ıştə fərzəndi bəştə ağuşi qəteydəbe.ısət bo har qıləy sıtəm bərtərəf iyən har qıləy rabitə ğoym kardero,həmmə fərzəndonku bətı vey umudəvom”.Əbu Tolıbi voteşe:bə Xıdo ğəssəm ki,deştə qırd vucudi ıştı sıfarışım ğəbul karde”.Əbdul-Mıtəllıbi ıştə dastış bə Əbu Tolıbi səmt bardeşe iyən çəy dasti piyo noşe və voteşe:”ısət maq bomı nuş be”…..