Ğasimi:Əlriyadı iclos sioniston fitnəy.
İroni xarici koon vəzorətxonə sıxanəvot Amerkə prezidenti bə Səudiyyə Ərəbıston səfər kardeku işarəş karde ki Əlriyaddə Ərəbi-Amerkayi iclosədə iştirak kardeyu və ım iclosış sionistiyə fitnəş zınə.
Səudiyyə Ərəbıstonı podşo Səlman Bin Əbduləziz çanvaxt çimiku bə nav dınyo 17 qılə məmləkəti yolonru məktubış vığande və bəvonku bə Əlriyad səfər karde iyən de Amerkə president Donald Tramp vindımon dəvoniyero ki ğərore mayə manqi 23-ə təşkil bıbo dəvətış kardə.
ironi xarici koon vəzorətxonə sıxanəvot Bəhram Ğasımi zinə qıləy xəbəriyə iclosədə Donald Trampı bə Səudiyyə Ərəbıston səfər karde və Ərəbi-Amerka iclosədə iştirak karde həxədə votışe: ım məsələ qıləy sionistiyə fitnəy və Səudiyyə Ərəbıston de Telaviv bəştə əlağon diğğət doe əsosi ım iclosi nomi əvəz kardeədə hərəkət kardedə ım əlağon bıpoşno.
Ğasımi votışe: daxiliyə problemon bə Yəmən hucum karde və hakimiyyəti dılədə bə çərçivə eqıniye ərəbıstonış bə Ərəbi-Amerka iclosi bərpo karde tərəfi hidayətış kardə və əlavəş karde məntəğədə bə Səudiyyə Ərəbıstoni tojə fəaliyyəton diğğət doe əsosi Əlriyad cəhdış kardə jıqonə iclosədə terarizmı inkişaf doe bəhsi həm kam bıkə.
ironi xarici koon vəzorətxonə sıxanəvot bə Amerkə sifarışış karde bə yolə xətoon dıço nıbo və nakonə səhvə hərəkəton təkrar nıkə çunki çəy nəticədə bə amerkəvıjon obəqardə.
Ğasımi votışe: İron həmmişə sulhi tərəfdare və de terarizm mubarizə barde domoədə bə və əlavəş karde əvoni ki de terarizm mubarizə barde iddaşon heste bəpe ironi ro iyən metodi domoədə bıbon ta çəvon rostiyəti subut bıbo.
