Pezeşkiyan:Dışmeni məğsəd İslomi kişfəron tərəğği royədə maneəon icod kardeye

İroni prezdent de Tırkiyə xarici koon vəziri bıə didoədə votəşe:"Mısılmonə xalğon çe mıştərəkə dışmenon təzyiği jiyədə cəhd kardə qıləy vaxtədə,İslomi kişfəronku bo iyandero şərton hoston kardey və məsələon mırəkkəb kardeyku pərhiz kardey çəş kardey beydə.

İroni prezdent Məsud Pezeşkiyan zinə işambə ruji şəvi zəmonədə de Tırkiyə xarici koon vəzir Hakan Fidani bıə vindemonədə bə dıqlə məmləkəti miyono munosibəton torıxi mədəni və bıvəti rabitəon işorə kardə holədə çın munosibəton bə nığılə rişə,həğiği və hevujə inkişofi potensiyali malikış zıne və əlovəşon kardə:"Əqər İslomi kişfəron vohidə irodə çərçivədə və bə ibemon,nezəti və təcrubə mubodilə əsos hərəkət bıkon,hiç qıləy zu bo mısılmonə milləton problem icod kardey nibəzıne.”

Bə “Pars Tudey” doə məlumoti əsos,bə İslomi kişfəron miyono munosibəton və strateji nezəti zumand kardey vocibəti təkid kardə Pezeşkiyan,reqiyonədə mevcud bıə behronon bəziyon çe kali mudaxilə əkə aktyoron suyi-ğəsdon və mubahisəon ziyod kardey məhsul hisob kardə holədə bəyonış kardə:“Im cərəyonon məğsəd bə reqiyoni səhfə niyyəton və siyosəton təhmil və məcbur kardey və çe İslomi kişfəron tərəğği iyən inkişofi royədə maneəon icod kardeye”.