Ərağçi Tehronədə de Səudiyyə Ərəbıstoni barzə vəzifəynə diplomati vindemon

İron İslom Respublika xarici koon vəzir işambə ruji bə Tehroni səfə kardə Səudiyyə Ərəbıstoni xarici koon vəziri muavini dido və çe dıqlə məmləkəti miyono dıtərəfinə mənafeyon icod kardə sahəonədə əloğəon və həmkoəti hovuj kardey roonışon muzakirə kardə.

İroni xarici koon vəzir Seyd Əbbos Ərağçi və Səudiyyə Ərəbıstoni xarici koon vəziri siyosi məsələon sahədə muavin Səud bin Məhəmməd Əs-Sati Tehron-Ər-Riyadi dıtərəfinə munosibəton,həmən reqiyonal və beynəlxalğə hodisəonışon muzakirə kardə.İroni xarici koon vəzir çe seonist rejimi işğal bıə Fələstinədə qenosid iyən cinoyəton dəvom kardey,çın rejimi bə Livan və Suriya zidd hərbi təcavuzi zumand kardeyış reqiyon və dınyoədə bo sulh və əmniyyətiro həmməysə dıjdə təhdidış zınə və bo seonist rejimi məntəğədə muharibə icod kardey və beğanunəti navi qəteyro reqiyonal və İslomi kişfəron miyono bə ziyodə həmkoəti və koordinasiya ehtiyoc bey təkid kardəşone.

Səudiyyə Ərəbıstoni xarici koon vəziri muavin Səud bin Məhəmməd Əs-Sati həm bın didoədə çe Ər-Riyadi bə reqiyonal sulh və sabitəti mıhofizəro reqiyonalə kişfəron miyono koordinasiya və həmkoəti zumand kardey vocibəti anqıl mevğeyiş təkid kardə.çın vindemoni bədiqə Səudiyyə Ərəbıstoni xarici koon vəziri muavin de İroni xarici koon vəziri çe Suriya məsələon sahədə bıə xususi numoyəndə Məhəmməd Rıza Rauf Şeybani həm dido iyən votemononış kardə.