İrağçi:amerkə iyən bəhreyn çe Əmniyyət Şuraku suyi-istifodə kardedən

İroni xarici koon vəzir de qıləy nomə çe Hormozi tanqə vəzyəti barədə çe amerkə iyən bəhreyni tərəfiku nışon doə bıə i tərəfin iyən təhrikamizə ğətnoməku tənğıd kardə holədə,təcovuzkoron bənə boştə ğeyri-ğanuni hərəkəton bəhonə vardero bo Əmniyyət Şuraku suyi-istifodə kardey icozə nıdoyero bə beynəlxalğə iştimoiyyəti məsuliyyətonış təkid kardə.

Bə Pars-Tudey doə məlumoti əsos,İroni İslomi Respublikə xarici koon vəzir Seyd Əbbos Ərağçi de qıləy nomə bə İMT sərkatib Antoniyo Qutereşi,bə Çini xarici koon vəzir Vanq Yi iyən bə Çini İMT-ədə bıə səfir iyən dayimi nımoyəndə və bə İMT Əmniyyət Şura devrəynə rəyisi və həmçinin bə İMT-ədə uzv bıə kişfəron xitobən ımış bəyon kardə ki,Hormozi tanqə ısətnə vəzyət sərost iyən məhz çe amerkə iyən sehyonist rejimi bə İroni ələyh təcovuzkoronə,hədərə iyən ğeyri-ğanuni canqiku nəşətış seyə.Çın nomə mətn jıləvoniye:Çe amerkə iyən bəhreyni navnıvşşti həyğiyə hədəf,səhnədə mevcud bıə həyğəton təhrif kardey iyən çe amerkə Farsi kandov iyən Hormozi tanqədə bə İroni ələyh navnə iyən cariyə ğeyri-ğanuni hərəkəton bəhonə vardeyroye.qıləy məntəğə ki,çandə həzo mayl çe amerkə sahilonku bə diyəroye.Əy əlovəş kardə:Beynəlxalğə İştimoiyyət bəpe icozə nıdo ki,Əmniyyət Şura çe təcovuzkoron tərəfiku suyi-istifodə kardey nıbu və ya boçəvon ıştə ğeyri-ğanuni hərəkəton bəhonə vardero bə qıləy avjori təbdil nıbu.Ərağçi təkidış kardə: Vey barzə həddədə huşin bey zəruriye ta bo təsbit bıə beynəlxalğə həxon prinsip iyən ğaydəon təhrifiro harcurnə səyon navi qətey bıbu.