İmom Əli(ə)-i fəziləton

çı ozoditələbə insonon İmom Əli(ə)-i fəziləton

Imruj mıborəkə Rəməzonə manqi 19-ə ruj de ozodi tələbə insonon rəhbər İmom Əli(ə)-i zərbət vindey ruji təsoduf kardedə.Hicri-Ğəməri çılminə ruji Rujə manqi 19-ə ruji sıbi faxti,çı ədolət iyən təğva simvol bıə merdi sə,de dılış de kin-kudurət və ədovəti pur bıə çı insonon vey bədbəxtə fərdi şımşi vositə poə be.hale-ğəziyə jələvoni be:

həmonə və`də doə bıə şəvi,çı fəziləton əmir Əli(ə) bəzi faxton çı otağiku bə bi beşedəbe və osmoni tərəf nəzə kardedəbe.Əv çı Xıdo-Rəsul(s) kəlomi bə yod dınoydəbe ki,Hələmo zəmonədə bəy hamyeşe:"bın manqədə bəştı sə bə xoş nıomə hodisə bome.vindedəm ki,tı nımoj votə holədəş və qıləy bədbəxtə inson de şımşi zərbə ıştı sə poə kardedə və ıştı riş deştı sə xuni ranqin bəbe".

Əli(ə) qahi faxti istiğfori zumzumə kardedəbe və qafi faxti həm "Yasin"-i mıborəkə surə tilovət kardedəbe.həmonə şəvi çı Əli(ə)- nımoj iyən razo-niyoz de coqlə manqon farğ kardedəbe.joqo ki,ə həzrət ıştə mınocatonədə jıqo ərz kardedəbe:"Xıdolim ha! marq iyən mardey bomı mıborək bıkə".

Həxı tərəfdoron rəhbər bo sıbi nımoji voteyro,tadibəsə bə məçiti tərəf hərəkətış karde.Əli(ə) bə məçit varid be və şəvi zılmətədə çandə rıxət nımojış vote.çən,peşo bə məçiti penə hissə petate və sıbi əzonış doe.qıləy əzon ki,çəy imon iyən təğva sayədə co qıləy cəh-cəlol iyən əzəmətış hestebe.peşo Əli(ə) bə nımoj mande.çın nımoji həm co qıləy hol-əhvolış hestebe.və`də bıə ləzə oməbe rəsəbe.çı insonon vey sığədılə fərd İbni Mulcəm məlun qədə-qədə ə həzrəti nez be və de zəhri aludə bıə şımşiş bə İmom Əli(ə) mıborəkə səş enovniye.qıləy zərbə ki,islomi ummətış çı Əli(ə)-i vucudiku məhrumış karde iyən insoniyyətış bə ın yolə şəxsiyyəti matəmış nıştovne.

Bə razo-niyoz iyən eşği səccodə nıştə İmomƏli(ə),bəştə xuni ğərğ be və çı dınyoku ozod bıey ləzzətış çaşte.Əv çı bebəfoə insonon bəçəy cism iyən rufi varid kardə əzob-əziyyətonku perəxe.çı deşmıni bəçəy mıborəkə sə varid kardə zərbə faxti,ə həzrət çəşonış bə osmoni tərəf xıyə kardə holədə ərzış karde" ğəssəm bıbu bə Kəbə pərvərdıqori az bə feyz rəsim,perəxim".