Ğərbədə islomofobiyə

Ğərbədə islomofobiyə

Isət islomofobiyə ğərbi məmləkətonədə bə qıləy adəti təbdil bıə.harçənd kali vaxton ğərbi şəxson iddio kardedən ki,islomə din çı sulh,məhəbbət iyən aşişə dine və çı təkfiri iyən vəhhabi terroriston kardə koon bə ilahi oxonə pəyğombər Muhəmməd(s)-i vardə təlimon hiç qıləy nisbətış ni,əmmo ğərbi dıvləton siyosətmədoron deştə əməlon nışon doydən ki,əvon həmonə təkfiri iyən terroristə qrupon zumand və himoyə kardə holədən.Yolə Britaniyə sərvəzir xanım Treza Mey çı İngiltərə vəzir beyədə ya iminə vəzir beyədə,çandə kərə çı DAEŞ terroristə qrupi mohiyyəti barədə sıxanış votəbe.İngiltərə mıhofizəkoron partiyəku bıə sərvəzir Treza Mey se sor çımi bənav Suriyədə de DAEŞ terroristə qrupi dasti vəhşiyonə formədə kıştə bıə İngiltərvıjə insonə həxon sahədə aktivə şəxs Devid Henizi kıştə kəson həxədə jıqo votəşbe:”Əvon ıştəni islomi hukuməti hisob kardedən,əmmo bahaştanən az bəşmə həyğəti bvıotom. əvon nə hukumətin və nə islom.bə nifrəti loyığ bıə ım ideloqiyə bə həyğiyə islomi hiç qıləy dəxlış ni”. Treza Mey ıştə sıxanonədə bə co dığğət kardəninə nuktəon həm işorəş kardəbe ki,ım həm çəy çı osmoniyə kitob bıə Kərimə-Ğıroniku çok-çoki xəbədo bıey nışon doydə.ehanə ikəs bə ım sıxanon votəkəsi dığğət nıko,jəqo təsəvvır bəkay ki,ım qıləy mısılmonə alime ki,jıqo islomi nığıl zıneydə.Treza voteydəbe:”Ğıron voteydə dinədə hiç qıləy məcburiyyət ni.çən,icozə bıdən ki,çın saloniku ım mesaji mıntəşirkəm ki,radikalə qrupon hiçfaxti çəmə miyono təfrığə eğandey əznınin.bıdə ım mesaj çiyo xaric bıbu ki,əmə zınedəmon islom sulhi dine və deçəmə deşmınon ideoloqiyə hiç qıləy rabitəş ni.bəhaştənən əmə de İngiltərə mısılmınon duş bə duş bımandəmon.əmə bəbe ıştə dasto omə koon əmcom bıdəmon ta ım ideoloqiyə məğlubkəmon və çı İngiltərə mısılmonə cıvonon radikal bıey vəy bıqətəmon.”

Deməkə ki,ğərbi siyosətmədoron İslomi dini mohiyyətiku xəbədon,əmmo praktiki əvon bo ğərbədə de ğərbi informasiyə vositəon və mediyaon vositə bardə bıə islomofobiyə siyosəti navi qətey iyən bə islomi ələyh bıə həmləon bə kam kardey koyədə hiç qıləy mısbətə rol ifo kardedənin.ısət ğərəbədə bə silomi ələyh etırozon tiki həm ziyod bıə və əvon bə mısılmınon məçiton,nımoj votə vırəon iyən məzhəbiyə məkanon həmlə kardedən.əmə şoyd bimon ki,Britaniyədə çandə dəvardə manqonədə  London iyən Mançesterədə çandə qılə terroristə hodisəon bə əməl ome ki,çın terroristə hodsəon nəticədə 35 nəfər kıştey be.çominə iyən pencminə terroristə həmləonədə ğırbon bıə kəson mısılmınon bin ki,əvon nımoji vocibati bə vırə rosney bədiqə məçitiku bə bi beşə holədə bin. İngiltərə rujnomə “İndipendent” bın zəminədə ıştə tojə məğaləonədə nıvıştəşe:Britaniyə Avropə İttifoğiku xaric bıey (Bergzit)bəpeştə,bın kralətiyədə bə islomofobiyə ayid cinoyəton iyən irğçiyə hərəkəton mislış nıbə formədə vey bıə holədəy.çı Britaniyə polisi tərəfiku bə dast omə məlumaton əsos,bın məmləkətədə bə nifrətamizə hərəkəton ayid bıə hodisəon mığdor,Bergziti  həməparsemon iyən referendumi bədiqə dəvardə yonzə manqi ərzədə 23 faiz və bənə İgiltərə iyən Uelsi bıə bəzi vıronədə 50 fayiz  vey bıə.

Bə İndipendenti məlumati əsos,kali islomiyə mıəssiəson bə mısılmınon ələyh nifərti xoto bıə cinoyəton ziyod bıe nışon doydə.joqo ki,de tobə ısət 23 kərə bənə umumi nəğliyyat vositəonədə bə mısılmınon həmlə kardey,dıjdə ticori şirkətonədə əvoni ixroc kardey,de şoqirdon vositə nımoji mərosimi bərpo kardey navi qətey və co vırəon ğeyd bıə.Avropə co kişvəronədə həm bə mısılmınon ələyh islomofobiyə, diskriminasiyə və irğçiyə hərəkəton ziyod bıə. əmmo ğərbi devləton bo ım qırd islomofobik hərkəton vəy qəteyro ıştəku hiç qıləy reaksiyə nıçşon doydənin.əla-rəğmən əvon zıneydən ki,terrorizm insonon əmniyyəti təhdid kardə vey dıjdə çiye,əmmo əmələn çəvon siyosəton çı terrorizm iyən radikalizmi tərvic kardey hədəfədə hərkət kardedə.

İngiltərə dıvlət bənə Amerkə dıvləti ısət təkfiri iyən terroristə dastəon tərvic iyən zumand kardey koyədə çı navəjənonkuye.İrağ iyən Suriyə milləti ləşkər bın oxonə manqonədə DAEŞ terroristə dastə uzvon məf kardey koyədə veyə noiliyətonışon bə dast vardə.əmmo siyosi eksperton bın bovədən ki,DAEŞ-i ko bə oxo rəsəni.çıro ki,çanədə çı DAEŞ-i mali iyən ideoloji mənbəon fəale,çın təkfiri iyən terroristə dastə təhdidon soğnə bəsə millətonsə bəmande.təkfiri iyən terroristə qrupon baği mandey,ğərbədə islomofobiyə iyən bə islomi ələyh hərəkəton dəvom pəydu kardey mənoədəy.zira ım terroristi iyən təkfiriyə qruponin ki, çı islomi və çı dini islomi sulh iyən ədolət tələb kardə təlimon çehrə təxrib kardey zəminə hozzı kardedə.ısət ım sıvol bə meydon beşedə ki,ğərbi dıvləton çokonə həm bə terroristə qrupon və həmən bə ğərbi məmləkətonədə bə əməl om islomofobiyə cərəyoni koməq kardedən.Hamburqədə bərpo bıə G20-i iclosədə bəhs bıə mevzuonku qıləyni çın terroristə dastə maliyyə mənbəon bə dəbaste be.təğribən bın sammitədə iştirok kardə qırd devləton,həmçinin Səudiyyə Ərbıston həm ım planışon himoyə karde.komik və sırəynə səhnə iyoe ki,həmməkəs zıneydə ki,terroristə dastəon çı kon məmləkətonku ıştə maliyyə dastəqi seydən. İngiltərədə çın təkfiri iyən terroristə qrupon maliiyə dastəqi mənbəon barədə dqılə təhğiğ abrdə bıə ki,çəvon iminə qılə iyulə manqədə mıntəşir bıə və dıminə qılə çap bıey və həm İngiltərə iminə vəzir Treza Mey qətışe.”Henri Cekson” mıəssisə  təhğiğaton nışon doydə ki,Britaniyədə fəaliyyət nışon doə radikalə qrupon maliyyə koməqon çı Səudiyyə Ərəbıstoni tərəfikuye.bın raportədə omə ki,dəvardə 50 sori ərzədə 76 milyard avro həcmədə bo təkfiri iyən vəhhabi ideoloqiyə tərvic kardero sərfış kardə.Qlobal İslomi Təhğiğati Mərkəzi (FFGİ)rəyis  Suzanna Şreder Almaniyə Frankfurt şəhrədə çı “Henri Cekson” mıəssiə təhğiğaton məlumati barədə voteydə:”jıqo statistik məlumatonku az təəccıb kardedənim.məlume ki,Ərəbıston de vəhhabiyəti ideoloqiyə pevolo kardey məşğule.” Xanım Şreder təkid kardedə ki, Səudiyyə Ərəbıston fəğət de maliyyə komqəon ğane bedəni və co təbliği mənbəon həm çəvon ixtiyorədə ğərol doydə.İrion İslom İnğılobi bəpeştə Ərəbıston de şiddəti larze və əve bəçəy ələyh təzyiğon vey be.