İslomədə şəfoət
İslomədə şəfoət
Vəhhabiyəti fırğə İlahi ovliyaon ğəbon ziyorət kardey əvoni pərəstış kardey mənoədə zıneydən və əy bidət və şırk hisob kardedən.çəvon nəzəku bə dini rəhbəron iyən imomon ehtırom noey və əvoni boştə qınon xoto vositə ğərol doey,qıləy əbəs iyən bihudə koye.bəçəvon qımoni əsos,Xıdo pəyğombər iyən ovliyaon ğəbi palu dıvo iyən tələb kardey,bənə sığ iyən çu tonoku dıvo kardeye və ım ko şırk hisob kardedən.
Vəhhabi iyən sələfi fırğəon ibdəti mənoədə sırfən bəçəy luğəvi məno yəni xuzu,xuşu iyəntəzim kardey məno dığğətışon kardə və etığodışon heste ki,ğərəz Xıdo çı har qıləy movcudi vədə təzim kardey şırke. əvon bə həmonə əsos şırki dayirəşon hevuj kardə və harcurnə ğəbi ziyorət,ilahi pəyğombər iyən ovliyaonku şəfoət tələb kardey çı şırki misdoğ iyən nımunəonku hisob kardedən.
Kərimə-Ğıroni istilohədə şırk bo Xıdo şərik,misl iyən həmto ğərol doey mənoədəy və ikəs ki,bo Xıdo şərik ğərol bıdo,mışrike.əmmo ibodəti barədə bəbe bıvoti ki,bo ikəsi ibodət kardeyro lozım bıə şərt ıme ki,ıştə kardə koonədə əy məbud və Xıdo bızınəmon və de məğsəd iyən niyyəti çəy mığobilədə təzimkəmon.çoko ki,rujonə nımojonədə bə Xıdovəndi votedəmon:”iyyakə nə`budu və iyyakə nəstəin”-fəğət tıni ibodət kardedəmon iyən fəğət ıştıku koməq tələb kardedəmon.(Həmdi surə).
Kərimə-Ğıron çandə qılə ayəonədə sıvoy Xıdo co çiyon ıştə Xıdo,rəbb iyən məbudi unvanədə zınə mışrikon əməlon,şırk zıneydə və əy mızəmmət kardedə.əmmo iksəi vədə əy Xıdo nızınə holədə bəy təzim kardey,ibodət zıneydəni.çən,nokə və bandəon ıştə əğə iyən soybon mığobilədə kardə təzim,çəvon ıştə xıvandi ibodət kardey hisob kardey nibəbe.bə həminə dəlili xoto pəyğombər,imomon iyən co salehə bandəon ğəbon kəno bəvon hurmət iyən ehtırom noə millət,mışrik nin.zira həmonə camaat əvoni Xıdo zıneydənin və bəvon pərəstış kardedənin.
Kərimə-Ğıroni kəno islomi pəyğombəri(s) ayin və sınnət həm ım mevzu təsdığ kardedə.Xıdo Rəsul(s) iyən çəmə məsumə imomon ki,çə həzrəti pokə nəslikuye ıştən bəştə mardəkəson ğəbi ziyorət şıən və milləti həm bə ın ko sıfarış kardedəbin.
Ehanə əhli-sınnəti rəvoyəton mətnonədə əhli-ğuburi ziyorəti həxədə təhğığkəmon,bəvindemon ki,çəvon nəzəku əhli-ğuburi ziyorət qıləy məşru iyən ğanuniyə koye.əhli-sınnəti fiğhiyə kitobonədə əhli-ğuburi ziyorəti foydəon barədə ziyodə nımunəon omə.Hakim Nişaburi deştə zikr kardə sənədi vardəşe ki, peyğombəri(s) rivoyətonədə bə ğəbon ziyorət kardey əmr bıə və çəy bənə zohd,ibrət və pand peqətey və marq iyən axırəti ruji bə yod dənoe,dıli nam bıey və çokə koon ziyod bıey bıə foydəon aşmarde bıə. (Hakim Nişapuri,1 cild,səyfə 532).
İbn Əbi Muleykə əhli-sınnə mıhəddis və hədis votə şəxsonkuye ki,pəyğombəriku(s) nəğl kardedə ki, hamyəşe:”bəştə mardəkəson soyəx bışənən və bəvon səlom bıdənən.zira ım əməl boşımə ibrəte.”(Rizvani,503:1385).
Çandə qılə hədisonədə həm omə ki,ilsomi pəyğombər(s) milləti təşviğ kardedəbe ta bəçəy ğəbi ziyorət bon.joqo ki,hamyəşe:” hakəs çımi mardey bəpeştə ziyorətko,bənə mıni çımı bəyji bıə zəmonədə ziyorət kardə kəsi misliye.”
Şiyə rəvoyətonədə həm çı əhli-ğuburi ziyorət iyən çəy foydəon həxədə veyə hədison heste.ə cumlə omə ki, Xıdo-Rəsul(s) ha penc şambə deştə əshobonku idastə bo əhli-ğuburi ziyərtiro bə “Bəqi” ğəbıston şedəbe.İmom Bağır(ə)-i səhabəonku qıləyni voteydə:mı de ə həzrəti bim ki.deyənde bə”Bəqi” ğəbıston vardi bimon.əyo İmom Bağır(ə) çı Kufə şiəyonku qıləyni ğəbi sape mande və jıqoş vote:”Xıdolim ha! bəçəy ğurbət iyən coyli beıy rəhmkə! Və tı çəy vəhşəti mənus bıbi və ıştə rəhmətiku bəy oroməti bıdə. joqo ki,ğərəz ıştı bə co kəson rəhməti ehtiyocış nıbu.əy bəçəy piyə kəsi mulhəğkə,dəçıkon.” (Kuleyni,3-ə cıld,səyfə 229).
Rəvoyəton prizmaku ziyorət bo əhli-ğuburi dıvo kardey iyən boəvon məğfırət tələb kardey xoto vey mınosibə fırsəte.Xıdo Rəsul(s) hamyedə:”ğəbədə bıə aşmardə bənə tasə şəxsiye ki,vanq jeydə koməq tələb kardedə və ıştə pı,bo ya dusti tərəfiku qıləy dıvo çəş kardedə və havaxti bəy qıləy dıvo bırəso,ım boəy dınyo iyən bəvədə bıə qırd çiyonku bey mahbube.çı bəyjiyə şəxson bo mardon bıə hədiyyə,boəvon dıvo iyən məğfırət tələb kardeye.”(Feyz kaşani,8-ə cıld,səyfə 291).
Dini rəhbəron sirə və rəftoronədə omə ki,əvon bə mardə kəson rufi səlom vığandeydəbin və de ın vositə bəvon ehtırom noydəbin. Həlbəttə ruşine ki,çanədə çə ğəbi soybi mənəviyə məğamış barz bıbu,ım təkrim iyən ehtırom tiki həm ziyod bəbe.
Bə tarıxi mənbəon əsos,Peyğombəre-Əkrəm(s) Məkkə fəthi bəpeştə bə Mədinə oqardeyədə “Əbva” məntəğədə ıştə əzizə mo ğəbış ziyorət karde və çəy ğəbi kəno bəme.həmmə kəs həm çı pəyğombəri(s) ıştə inə ğəbi səpe bəy noə ektıromi şoyd be.de ın ko əloğədor hədisi yolə alimonku qıləyni “Hakim Nişaburi” çın hədisi votə kəsonku nəğl kardedə ki,voteydə əmə hiçfaxti vindəmon nıbe ki,peyğombər(s) bənə həmonə ruji ki,ıştə moə ğəbisə bəme,bıbəmo.
Hah holədə tarıxi həyğəton şoydəti kardedən ki, çə həzrəti zəmoniku de tobə ısət,əhli-ğuburi ziyorət və çı dınyoku şıə islomi dini yolə şəxsiyyəton və imomon nomi de ehtııromi zikr kardey,çı qırd mısılmınon miyono ısət çı şiyə bıbu ya sınni rəvocış pəydu kardə.əmmo sələfi və vəhhabiyon dini yolon ğəbon ziyorət kardey və çəvon ğəbon sape mandey şırk zıneydən.təkfiri iyən terroristə qrupon həm de inhirofiyə ideoloqiyə har vırədə ki,qıləy pəyğombər iyən ilahi ovliayon ğəbon vindedən,əvoni de bombə iyən co tıpemoni maddəon vositə vırt-volo kardedən.əmmo həni çəyku bənə çmə pentono aşmardə foydəonku hiç qıləy bəhrə bardedənin.
