Amerkə tojə sanksiyaon puç və befoydəy.

İroni xarıci vəzarətxanə Amerkə ijən İroni bə sanksiya dənoə məhkumış kardə iyən təkidış kardə: İron həm mıtəğabilə surətədə çı Amerkə huğuği və həğiğiyə şəxson bə sanksiya siyahə əlovə bəkay.

Bə İroni əleyh tojə sanksiyaon qıləy holədə əncom bıə ki Amerkə prezident Donald Tramp zinə 2 minə kərə təsdiğış kardə ki İron ətomiyə təvafuği icraş kardə.

Amerkə maliyə vəzarətxanə Mayə manqi 17ədə həm çı İron və Çini 7 qılə şəxs və şirkəton de rəkıtiyə bərnoməon bəhonə təhrim və bə sanksiya siyahə izofə kardə bıə be.

Amerkə iddiyaş kardə ki İroni rəkıtiyə bərnoməon de əmniyyət şura ğətnoməon bərobər ni və hol ım ki çı Avropa i bemoni xarıci siyasəti sıxənəvot təsdiğış kardə ki İroni rəkıtiyə imtovonon bə ətomiyə təvafuği zidd ni.

İron həm vey kərə elanış kardə balıstik rəkıton bo ətomiyə bombaon soxtə bəni ijən İron bə ətomiyə bombaon ehtiyociş ni və hol ım ki İron çı NPT mığovilədə həm uzviyətış heste.

Amerkə maliyə vəzarətxanə zinə ruj bə İroni əleyh deşmənçiyə siyasəton dəvomədə ijən İroni 18 qılə həğiği və huğuği şəxsonış de rəkıtiyə bərnoməon bəhonə bə sanksiya siyahə izofəş kardə.