De İmom Sadığ(ə)-i şəhodəti mınosibəti
De İmom Sadığ(ə)-i şəhodəti mınosibəti
Həzrəte Muhəmməd(s) –i pokə nəvə İmom Cəfər Sadığ(ə)-i şəhodəti sorqardımoni rujədə ğərol qətəmone.qıləy şəxsiyyət ki,çı həyğət iyən rostəvıjəti vey yolə sima be.qıləy yolə merd ki,çı elm iyən hikməti xəzinə be və bo Muhəmməd(s)-i vardə ayini bəyji oqəteyro qıələy hevujə hərəkətış bə ro dəğande.İmom Cəfər Sadığ(ə) Hicri-Ğəməri 83-ə sorədə Rəbiiul-Əvvələ manqi 17-ədə Mədinə şəhrədə bə dınyo çəşış oj kardə.ə həzrət ıştə imoməti 34 sori ərzədə itərəfo de tağutə rejimon inkor kardey və co tərəfiku çı insonon təfəkkur iyən əndişədə qıləy fərhənqiyə inğılob kardey məşğul be və misliş nıbə islomi həyğəton bo məxloği təbyin kardedəbe ta inki,Hicri-Ğəməri 148-ə sori Şəvvalə manqi 25-ədə 65 sinnədə de Əbbasi sulolə dıminə xəlifə Mənsur Dəvaniği əmri vositə bəy zəhr doeybe və bə şəhodət məğami rəse.de İmom Sadığ(ə)-i şəhodəti ruji mınosibəti səbə səloməti ərz kardedəmon iyən bə ə həzrəti şəhodəti ayid de qıləy məxsus bərnomə şımə xıdmətədəmon.
Qıləy merd bə İmom Sadığ(ə)-i xıdmət ome rəse və ərzış karde:mıni moyizəkə iyən bəmı ro nışon bıdə. İmom Sadığ(ə) bəy vey komilə şikilədə qıləy çokə moyizə kardeşe ki,çəy məse vey foydənine.jıqo ki, İmom(ə) sıftədə hamyeşe:ehanə Xıdovənde-Mutəali ıştı rızğo-ruzi bəştə ohdə peqətəşebu,həni tı boçi cəhdo-təloş kardedəş? İmom(ə)-i sıxanon çın mətləbiku hikoyət kardedə ki,çı əndozəku vey bıə cəhdon de etığodiyə məsələon əloğədore.çıro ki,çı qırd məxloğati məxsusən çı insoni rızğo-ruzi,çı naviku təmin iyən təzmin bıə və Xıdovənde-Aləm çı məxloağti ruziş təzmin kardə.əve inson həni bəbe boçımi xoto hiçfaxti norohət və niqəron nıboy.əmmo əsosinə işkol iyoe ki,insonon ıştə ruzi doə Xıdo zıneydənin iyən çəy və`dəonku xəbəşon ni və ya əgər həm bızınon bə həmonə və`dəon bovə kardedənin.İmom(ə) iyo çəşnavi doydə ki,şımə boştə jimoni dəvordınero kifoyət ğədərədə ruzi təmin kardero çı xariciku hiç qıləy problemon ni,bəlkəm movcud bıə muşkilaton şımə ıştən vucudi dıləkuye.yəni şımə qırd ım ruziyon çın hestemoni aləmi Xalığiku bıey bovə iyən etığodon ni.həyğətədə,ikəs ki,Xıdo zıneydə və bəçəy və`dəon bovəş bıbu,ıştə vaxtonış təğsım kardə iyən ıştə jimoni iqlə baxşi fəğət bo ko iyən məşğuliyyəti co kardedə.çoko ki,Əli(ə) hamyedə:” mumin bəbe ıştə şəv iyən ruzi bə se ğısmət təğsımkəy:boştə pərvərdıqori ibodət iyən sıtiyişiro co kardə zəmon,boştə jimoni xarcon təmin kardero co kardə zəmon iyən boştə solimə asayiş iyən istirohətiro co kardə zəmon”.
Xıdovənde-Mutəal rızğo-ruzi bəştə bandəon məsləhəti əsos tənzim kardedə.əmmo inson təsəvvır kardedə ki,çəy rızğo-ruzi ziyod beıy yəni veyə hərəbaxtətiye.əve əv bo veyə mol-devlət bə dast vardero ziyodə cəhd kardedə və bə dınyo moli inov həris bedə.İmom Sadığ(ə) ıştə moyizəon dəvomədə hamyedə:”əgər Xıdovəndi ruziş təğsım kardəbu,həni qırd ım hərisəti boçiye? Kərimə-Ğıroni çandə qılə ayəonədə həm bə insoni xitob kardə holədə hamyedə ki,Xıdovəndi bəşmə ruzi rosney barədə bıə və`dəon hukmən bə həyğət bərəse.həlbəttə,ımon bın mənoədə nin ki,inson çı kəsbo-ko iyən məşğuliyyətiku dast bıkəşo,bəlkəm çəy əndozə iyən mığdorədə ko iyən fəaliyyətko.ticorət iyən kəsbo-ko Xıdovəndi ohdədəy.rızğo-ruzi bə dast vardey koyədə bemənoə hərisəti nəhy bıə.
Pəxılə inson bənə fəğıron jimon kardedə və dayima norohəte ki,çəy vəomə çokonə bəbe.İmom Sadığ(ə) de qıləy ğəşənqə hədisi vositə pəxıləti həm mızəmmət kardedə və bə Xıdovəndi bəy əto kardə neməton bə co insonon rosney ko işorə kardedə.joqo ki,İmom(ə) hamyedə:və əgər Xıdovənd şımə baxşə çiyon əvəzi doydəbu,çən həni boçi pəxıləti kardedon?qıləy şəxs ki,yəğın pəyduko ki,har çi bıdo Xıdovənd da bərobər çəy əvəzi bədoe,çən həni boçi pəxıləti iyən xəsisəti kardedə.hədisi dəvomədə İmom(ə) hamyedə: ehanə əzob ilahi tərəfikuyebu,çən boçi qıno kardedon? ikəs ki,bovəko Xıdovənd çəy kardə qıno mığobilədə orom nibənışte iyən əzob bədoe,çokonə həni bə qıno mırtəkib bedə.Məarici mıborəkə surə 11 ta 15-ə ayəonədə omə “həmonə ruji qınokoron dılışon heste ıştə fərzəndon boştə əzobi dəf kardero fidokəyn iyən həmçinin jimoni həmro,ıştə bo,ıştə nezə odəmon və hejo bəy pənoh doə ıştə qırd ğəbilə.(bəlkəm,oruzuşon heste) zəmini dimisə bıə qırd məxloği fidokəyn ta əy peroxnon.əmmo jələvoni ni.həyğətən,həmonə otəş şuləvəre...” .
